राष्ट्रपति, उपराष्ट्रपति र रिक्त राष्ट्रिय सभा सदस्य निर्वाचनबारे आयोग पदाधिकारीसँग प्रधानमन्त्रीको परामर्श

काठमाडौं– प्रधानमन्त्री पुष्पकमल दाहाल प्रचण्डले निर्वाचन आयोगका पदाधिकारीसँगको छलफलमा राष्ट्रपति, उपराष्ट्रपति र रिक्त राष्ट्रिय सभा सदस्य निर्वाचनका लागि आवश्यक प्रक्रिया थाल्न निर्देशन दिएका  छन्। सोमबार सिंहदरबारमा आयोगका पदाधिकारीसँग भएको छलफलमा प्रधानमन्त्री प्रचण्डले यस्तो आग्रह गरेका हुन्।

प्रधानमन्त्री प्रचण्डले राष्ट्रपति, उपराष्ट्रपति र रिक्त राष्ट्रिय सभा सदस्य निर्वाचनका लागि आयोगका पदाधिकारीसँग परामर्श गरेको प्रधानमन्त्रीको सचिवालयले बताएको छ।

प्रधानमन्त्री तथा मन्त्रिपरिषद् कार्यालय सिंहदरबारमा भएको छलफलमा संविधान र कानुनमा व्यवस्था भएबमोजिम राष्ट्रपति, उपराष्ट्रपति र राष्ट्रिय सभा सदस्य रिक्त रहेको १ स्थानमा निर्वाचनका लागि आवश्यक प्रक्रिया थाल्न आयोगका पदाधिकारीसँग प्रधानमन्त्रीले आग्रह गरे।

छलफलमा प्रधानमन्त्री प्रचण्डले स्थानीय तह, प्रतिनिधिसभा र प्रदेशसभा निर्वाचन निर्वाचन सम्पन्न गरेकामा आयोग पदाधिकारीलाई धन्यवाद पनि दिएका थिए।