पुस मसान्तसम्म करको दायरामा आउनेलाई विशेष छुट

काठमाडौं– सरकारले पुस मसान्तभित्र स्थायी लेखा नम्बर (प्यान कार्ड) बनाएर करको दायरामा आउनेलाई विशेष छुट तथा सुविधा दिइने बताएको छ।

आन्तरिक राजस्व विभागले करयोग्य कारोबारमा सामेल भएको तर कर नतिरेकाको हकमा प्यान कार्ड बनाएर पुस मसान्तसम्म करको दायरामा आए विशेष छुट दिइने जनाएको हो।

विभागका सूचना अधिकारी राजु प्याकुरेलले तोकिएको समय प्यान कार्ड बनाई विगत चार  आर्थिक वर्षको विस्तृत विवरण बुझाए सोभन्दा अघिल्ला वर्षका कारोबार नखोजिने बताए। यद्यपि विगत ४ वर्षको विवरणको आधारमा आफैंले घोषणा गरेको कर भने तिर्नुपर्ने उनको भनाइ छ। त्यसअघिको हकमा कर तथा ब्याज शुल्क मिनाहा हुनेछ।

हालसम्म ३२ लाख बढीले व्यक्तिगत स्थायी लेखा नम्बर लिइसकेका छन् भने १८ लाख बढीले व्यावसायिक स्थायी लेखा नम्बर लिएको विभागको तथ्यांक छ।