प्रधानमन्त्री–गृहमन्त्री भेट, सिंहदरबार प्रवेशलाई सहज बनाउन छलफल

काठमाडौं– उपप्रधान एवं गृहमन्त्री रवि लामिछानेले प्रधानमन्त्री पुष्पकमल दाहाललाई भेटेर सिंहदरबार प्रवेशमा सर्वसाधारण नागरिकको सहज पहुँचका लागि प्रयास गर्नबारे छलफल गरेका छन्।

शनिबार बिहान प्रधानमन्त्री प्रचण्डलाई भेटेर गृहमन्त्री लामिछानेले नागरिकलाई सिंहदरबार प्रवेश गर्न सक्ने वातावरण निर्माणका लागि सहजीकरण गरिदिन आग्रह गरेका हुन्। 

हाल सिंहदरबार प्रवेशका लागि पास व्यवस्था गरिएको छ। तर सर्वसाधारणले सहजै सिंहदरबार पस्न सक्ने अवस्था छैन। सिंहदरबारभित्रका मन्त्रालयमा आफन्त कर्मचारी भए मात्र सर्वसाधारणलाई काम विशेषले जान दिने गरिएको छ। सर्वसाधारणले सिंहदरबार जान हैरानी खेप्दै आएका छन्।

प्रधानमन्त्रीसँगको भेटमा कोरोना संक्रमण व्यवस्थापनका लागि सीमा क्षेत्रमा सावधानी अपनाउने, हवाई र स्थलमार्गबाट आउने पर्यटकलाई ध्यानमा राखी स्वास्थ्य डेस्क र होल्डिङ सेन्टर स्थापना गर्ने विषयमा छलफल भएको गृहमन्त्री लामिछानेको सचिवालयले बताएको छ।

तराईमा शीतलहर र हिमाली क्षेत्रमा हिमपात व्यवस्थापन सहज रुपमा गर्न आवश्यक तयारी गर्ने विषयमा पनि छलफल भएको बताइएको छ। प्रधानमन्त्रीसँगको भेटमा गृहमन्त्री लामिछानेले राजस्व चुहावट नियन्त्रण गर्ने प्रतिबद्धता व्यक्त गर्दै अर्थ मन्त्रालयसँग समन्वय गरी काम अघि बढाउने प्रतिबद्धता जनाए।