समस्याग्रस्त सहकारी व्यवस्थापन समितिको नाम फेरबदल

काठमाडौं– भूमि व्यवस्था, सहकारी तथा गरिबी निवारण मन्त्रालयअन्तर्गतको समस्याग्रस्त सहकारी व्यवस्थापन समितिको कार्यालयको नाम फेरबदल गरिएको छ।

समितिको गत २९ मंसिरको बैठकले समितिको नाम परिवर्तन गरेको अध्यक्ष काशीराज दाहालले बताएका हुन्।

सहकारी ऐन, २०७४ को दफा १०४ बमोजिम  सरकारबाट समस्याग्रस्त घोषित संस्थाहरूको सम्पत्ति व्यवस्थापन तथा दायित्व भुक्तानी गर्नु समितिको मुख्य कर्तव्य हो। समिति गठनका बेला मन्त्रालयले समस्याग्रस्त नाम नराखे पनि पछि नामको अघि नै राखिएको शब्दका कारण नकारात्मक सन्देश गएकाले नाम परिवर्तन गरिएको जनाइएको छ।

नाम परिवर्तन भएपछि समितिले कार्यालयको वेबसाइट, बोर्ड र लेटरहेडमा समेत सहकारी व्यवस्थापन समितिको कार्यालय भनी नाम राखिएको दाहालले बताए।