लिटरेचर फेस्टिभलमा सांगीतिक कार्यक्रमको प्रायोजक खुकुरी रम

काठमाडौं- पोखरामा पुस ६ गतेदेखि  शुरू हुने ‘१०औं नेपाल लिटरेचर फेस्टिभल’ अन्तर्गत आयोजना हुने साङ्गीतिक कार्यक्रमको प्रायोजन खुकुरी रमले गर्ने भएको छ।

फेवाताल किनारमा हुने फेस्टिभल अन्तर्गत पुस ७ गते गोपाल योञ्जनको २५औं स्मृति दिवसको अवसरमा विशेष साङ्गीतिक कार्यक्रम आयोजना हुनेछ। योञ्जनका गीतहरूको सँगालो गोपालय पनि सोही अवसरमा विमोचन गर्ने कार्यक्रम छ। योञ्जनले पोखरामा लोकसङ्गीतको अनुसन्धान र लेखनमा लामो समय बिताएका थिए।

लिटरेचर फेस्टिभलमा यस बाहेक लोक–ब्यान्ड रैथाने र फ्यूजन गिटारवादक अनिल शाहीले पनि विशेष प्रस्तुति दिनेछन्। यी लगायत सबै साङ्गीतिक कार्यक्रमको प्रायोजन ‘खुकुरी रम’ ले गरेको हो। 

कम्पनीकी इभेन्ट म्यानेजर सुदीक्षा अधिकारीले कला, साहित्य र सङ्गीतप्रेमीहरूको विशेष उत्सव ‘नेपाल लिटरेचर फेस्टिभल’ सँग सहकार्य गर्न पाउँदा आफूहरूलाई गौरव महसूस भएको बताइन्। लिटरेचर फेस्टिभलको आयोजक बूकवर्म फाउन्डेशनका निर्देशक नीरज भारीले नेपालीको पहिचानका रूपमा धेरै देशमा निर्यात हुने उत्पादनलाई लिटरेचर फेस्टिभल अन्तर्गतका साङ्गीतिक कार्यक्रमहरूसँग जोड्न पाउँदा खुशी लागेको बताए।

यस पटकको फेस्टिभलको नारा ‘शब्दशक्ति उत्सवको एक दशक’ रहेको छ। पुस ११ गतेसम्म चल्ने शब्दहरूको उत्सवमा ५० भन्दा बढी सेसन, साङ्गीतिक साँझ र थप रोचक विमर्श हुनेछन्।

‘खुकुरी रम’ संगठित क्षेत्रमा स्थापना भएको देशकै पहिलो मदिरा उद्योग ‘द नेपाल डिस्टिलरिज्’ ले ६२ वर्षदेखि उत्पादन गर्दै आएको छ।