प्रदेश १ मा कुन पार्टीबाट दलको नेतामा को–को छन् आकांक्षी?

विराटनगर- प्रदेश १ सभामा ६ वटा राजनीतिक दलको प्रतिनिधित्व रहेको छ। ५ वटा राजनीतिक दलमा दलको नेता चयनमा समस्या देखिएको छैन। संसदको दोश्रो ठूलो दल नेपाली कांग्रेसमा दलका नेताका लागि गुटैपिच्छेका आकांक्षी रहेका छन्। 

प्रदेशसभामा २९ सदस्य रहेको कांग्रेसमा केन्द्रीय सदस्यसमेत रहेका अमृत अर्याल, भीम पराजुली, प्रदेश सभापति उद्धव थापा, बहालवाला आन्तरिक मामिला तथा कानुन मन्त्री केदार कार्की संसदीय दलको नेता बन्नका लागि तीव्र रूपमा लागेका छन्। 

प्रदेशसभा सदस्यसँगको भेटघाट, छलफल तथा नेताहरुको भेटघाटमा छन्। संस्थापन पक्षबाट अर्याल, कोइराला समूहबाट कार्की र सिटौला समूहबाट थापा र पराजुलीले संसदीय दलको नेतामा दाबी गर्दै आएका छन्। संस्थापन पक्षमा ११, कोइराला पक्षका ९ र सिटौला पक्षका ९ सांसद रहेका छन्। तीन समूहमा प्रदेश सांसद विभाजित भएकाले निर्वाचन हुने करिव निश्चित छ। 

कांग्रेस बाहेक एमालेबाट स्थायी कमिटी सदस्य समेत रहेका हिक्मत कार्की दलको नेता हुने निश्चित छ। एमालेमा कार्की बाहेक स्थायी कमिटी तहका अन्य नेताहरु नभएको र दलका दाबी पनि अरुको नदेखिएको एमाले श्रोतको भनाई छ। माओवादीमा आर्थिक मामिला तथा योजना मन्त्री इन्द्रबहादुर आङ्वो, एकीकृत समाजवादीमा मुख्यमन्त्री राजेन्द्र राई, राप्रपामा भक्ति सिटौला दलका नेता हुने निश्चित रहेको छ।