जन्मथलो कास्की पुगेका प्रचण्डले भने– अर्को चुनाव यहीँबाट लड्न सक्छु

काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आउँदो निर्वाचन कास्कीबाट लड्ने संकेत गरेका छन्। 

बुधबार आफ्नो जन्मथलो कास्कीको अन्नपूर्ण गाउँपालिका–१ स्थित श्री महेन्द्र आधारभूत विद्यालयको हीरक जयन्ती महोत्सव कार्यक्रममा प्रमुख अतिथि हुन पुगेका प्रचण्डले आउँदो निर्वाचन कास्कीबाट लड्न सक्ने बताएका हुन्। उनले आफू अहिलेसम्मका निर्वाचनमा फरक–फरक क्षेत्रबाट चुनाव लडेको भन्दै अर्को पटक कास्कीबाट लड्न सक्ने सुनाए। 

उनले भने, ‘मैले पहिलोपटक काठमाडौं र रोल्पाबाट निर्वाचन लडें। दोस्रोपटक मधेशबाट लडें। त्ययसपछि चितवनबाट लडें। अहिले गोरखाबाट चुनाव जितेर आएको छु। समय भनेजस्तो भयो भने अर्को पटक कास्कीबाट पनि चुनाव लड्न सक्छु।’ 

आफू देशभरि डुलेर निर्वाचनको माहोल बनाएको प्रचण्डले सुनाए। ‘म यस्तो नेता बनेको छु जो यो निर्वाचनमा पूर्वदेखि पश्चिम डुलेर निर्वाचनको माहोल बनाएँ। त्यो सफल पनि भयो,’ प्रचण्डले भने।