कैलालीमा बाक्लो हुस्सु, चिसो बढ्यो

धनगढी- कैलालीमा बुधबारदेखि हुस्सु लाग्न सुरु भएको छ। बुधबारदेखि बाक्लो हुस्सु लागेसँगै धनगढीसहित जिल्लाभर नै चिसो बढेको छ।

स्वास्थ्यकर्मीले चिसोमा अत्यावश्यक काम बाहेक बाहिर ननिस्कन आग्रह गरेका छन्। दमका रोगी, निमोनिया ग्रस्त बिरामीलाई चिसोमा समस्या हुन सक्ने भन्दै सेती प्रादेशिक अस्पतालका वरिष्ठ फिजिसियन कन्सल्टेन्ट डाक्टर शेरबहादुर कमरले यस्तो बेला ती समस्या भएका बिरामीले घरभित्रै बस्नु राम्रो हुने बताएका छन्। बाहिर निस्कनु परे न्यानो लुगा गालगाएर निस्कन उनको सुझाव छ।

मधुमेह रोगलागेका मानिसलाई पनि चिसोमा स्वास्थ्य समस्या आउन सक्ने उनले बताए। यसका साथै बालबालिकालाई रुघा, खोकी लाग्ने र ज्वरो आउन सक्ने हुँदा चिसोबाट बालबालिकालाई बचाउन उनले अभिभावकलाई सुझाव दिए।

प्रयाप्त झोलिलो खानेकुरा खाने र तातो पानीको प्रयोग गर्न सके चिसोको असरबाट बच्न सकिने डाक्टर कमरको सुझाव छ। तातोका लागि भित्र प्रयोग गरिने विद्युतीय सामाग्री वा आगो बाल्दा कोठामा हावा ओहोर दोहोर हुने व्यवस्था मिलाउन उनले आग्रह गरेका छन्। हावा ओहोर-दोहोर नहुँदा अक्सिजनको कमिका कारण पनि स्वास्थ्य समस्या हुन सक्ने उनले बताए।