जिल्ला अस्पतालको एक्स–रे सेवा सुचारु

खोटाङ-जिल्ला अस्पताल खोटाङले रेडियोग्राफरको अनुपस्थितिमा बन्द भएको एक्स–रे सेवा सुचारु गराएको छ। रेडियोलोजी शाखामा कार्यरत दुई जना रेडियोग्राफरको अनुपस्थितिमा आइतबारदेखि बन्द भएको एक्स–रे सेवा मंगलबार दिउँसो ३.३० बजेदेखि सुचारु गराएको हो। ओखलढुंगाबाट जनशक्ती झिकाएर एक्स–रे सेवा सुचारु गराइएको जिल्ला अस्पतालका निमित्त प्रमुख डा. चतुरानन्द यादवले बताए। 

दुई जना रेडियोग्राफरमध्ये एक जना बुवाको उपचारका सिलसिलामा भारत गएको र अर्का रेडियोग्राफर पारिवारिक समस्याका कारणले विदामा बसेपछि अस्पतालले २५ मंसिरदेखि २९ मंसिरसम्मका लागि एक्स–रे सेवा बन्द गरिएको सुचना जारी गरेको थियो। एक्स–रे सेवा बन्द भएसँगै चौतर्फी विरोध सुरु भएपछि जिल्ला अस्पतालले बैकल्पीक व्यवस्था गरेर एक्स–रे सेवा सुचारु गराएको हो। 

जिल्ला अस्पतालको एक्स–रे सेवा बन्द भएको जनगुनासो आएपछि सोमबार दिक्तेल रुपाकोट मझुवागढी नगरपालिकाका मेयर तीर्थराज भट्टराई र उपमेयर बिसन राईको टोली सोधपुछका लागि जिल्ला अस्पताल पुगेका थिए। जिल्ला अस्पतालमा सरदर दैनिक ६० जनाको एक्सरे हुने गरेको छ। जिल्ला अस्पतालको एक्स–रे सेवा बन्द भएपछि बिरामी अन्यत्र जान वाध्य भएका थिए। एक जना रेडियोग्राफर बुवाको उपचारमा भारत गएपछि १५/२० दिनदेखि एक्लै काम गर्दैआएका रेडियोग्राफर पनि विदामा बसेपछि एक्सरे बन्द हुनपुगेको थियो।