विराटनगर– विराटनगर महानगरमा १९३ वटा सहकारी संस्था दर्ता भएकामा ३६ सहकारी संस्था हराएका छन्। ती संस्थाबारे जानकारी नहुँदा र ठेगाना पनि प्रस्ट नहुँदा ३५ दिनभित्र कारोबारको हिसाबकिताबसहित सम्पर्कमा आउन महानगरले सूचना जारी गरेको हो।
पछिल्लो समय सहकारी संस्थाले ग्राहकको निक्षेप फिर्ता गर्न आनकानी गर्ने प्रवृत्ति बढेपछि महानगरको सहकारी शाखामा ग्राहक उजुरी पर्ने क्रम बढेको छ। ती सहकारीमा ताकेता गरेपछि सम्पर्कविहीन भएका हुन्।
सम्पर्कवहीन रहेका ३६ ऋण तथा बचत सहकारी संस्थाका फाइलमा उल्लिखित ठेगाना नभेटिएको, पटक–पटक ताकेता गर्दा पनि सम्पर्कमा आउन नचाहेको, सम्पर्क स्थापित गर्न नसकिएको र कुनै पनि प्रकारको कारोबारको विवरण पेस नगरेकाले ती सहकारीको नाममा सूचना जारी गर्नुका साथै नाम पनि सार्वजनिक गरिएको छ।
सम्पर्कमा नआएका ती सहकारीले साधारणसभासमेत नगरी कारोबारको विवरण सम्बन्धित शाखामा नबुझाउँदा कैयौंं ग्राहकको रकम डुब्ने जोखिम बढेर गएको छ।
त्यस्ता सहकारीमा विराटनगर वडा–२ को सक्रिय, वडा–३ को स्पर्श, वडा–४ को परिचय, सगुन र पुष्पाञ्जलि, वडा–५ को विराट कोसेली र एक्सेन्ज, वडा–७ को सुमेरु, विराट उपभोक्ता र हिमशिखर, वडा–८ को सहयोगी, वडा–९ को भिजन फर्मा, क्यापिटल, खाटु श्याम, सत्य ओम साई, सबल, युरो र हाम्रो बचत तथा ऋण सहकारी संस्था रहेका छन्।
यस्तै, वडा–१० को एभरेष्ट मल्टिपल, वडा–११ को ज्ञानपुञ्ज, निलकमल, यातायात, स्वर्णलक्ष्मी, वडा–१२ को गजलक्ष्मी, गरिमा, बखरी, ताजा तरकारी तथा फलफूल उत्पादक, वडा–१३ को नक्षत्र, वडा–१४ को बहुमूल्य, जुनतारा र प्रभावकारी, वडा–१५ को इच्छा, नेशनल, ऋद्धिसिद्धि र वडा–१७ को वाटिका र उपकार बचत तथा ऋण सहकारी संस्था रहेका छन्।
महानगरका प्रमुख प्रशासकीय अधिकृत दीपक पौडेलले सम्पर्कमा नआएका सहकारी संस्थालाई सम्पर्कमा आउन ३५ दिने म्याद जारी गरिएको बताए। उनले ती सहकारीलाई खोजेर कानुनबमोजिम कारबाही गरिने जानकारी दिए।–रासस