डोटीमा बालकसहित चितुवाको आक्रमणबाट पाँच जना घाइते

डोटी- डोटीमा चितुवाको आक्रमणमा परी पाँच जना घाइते भएका छन्। मंगलबार साँझ साढे बेलुका जिल्लाको पूर्विचौकी गाउँपालिका वडा नम्बर-५ बटाला गाउँका पाँच जना चितुवाको आक्रमणबाट घाइते भएका हुन्।

जिल्ला प्रहरी कार्यालय डोटीका प्रहरी निरीक्षक लक्ष्मीराज जोशीका अनुसार घाइते हुनेमा ४५ वर्षीया सरुदेवी बटाला, उनका चार वर्षीय नाति शिद्ध बटाला, २२ वर्षीया पुष्पा गिरी, १५ वर्षीय लाली गिरी र १० वर्षीया हसिना गिरी रहेका छन्।

बालक शिद्ध बटाला घरको आगनमा खेलिरहेका बेला चितुवाले आक्रमण गरेको उनकी आमा शारदादेवी बटालाले जानकारी दिइन्। बच्चा चिच्याएपछि हल्लाखल्ला गरेर लखेटेको चितुवाले गोठालोबाट घर फर्किदै गरेका सरु, लाली, हसिना र पुस्पालाई पनि आक्रमण गरेको प्रहरीको प्रहरीले जनाएको छ।

सुरुमा चितुवाले खुट्टामा टोकेको र पछि हसियाले हान्दा हातमा पनि टोकेको घाइते पुस्पा गिरीले बताइन्। घाइतेहरूलाई उपचारको लागि जिल्ला अस्पताल डोटीमा ल्याइएको छ। घाइते सबैको अवस्था सामान्य रहेको अस्पतालले जनाएको छ।