समानुपातिकमा सात पार्टीले पाउने भए सिट, कसको कति?

काठमाडौं- गत साताको आइतबार (४ मंसिर) मा भएको प्रतिनिधिसभा निर्वाचनको मतगणना अन्तिम चरणमा पुगेको छ। प्रत्यक्षतर्फ १६५ वटा निर्वाचन क्षेत्रमध्ये १६१ वटा निर्वाचन क्षेत्रको मतपरिणाम सार्वजनिक भइसकेको छ। अब चार वटा क्षेत्रको मात्र अन्तिम मतपरिणाम आउन बाँकी छ।

सुनसरी ४ मा मतगणना जारी रहेकोमा नेपाली कांग्रेसका ज्ञानेन्द्रबहादुर कार्कीको अग्रता छ। कार्कीले २५ हजार ९ सय ४४ र उनका प्रतिस्पर्धी एमालेका जगदीशप्रसाद कुसियैतले २५ हजार ६ सय २२ मतसहित पछ्याइरहेका छन्।

दोलखा, स्याङ्जा र बाजुरामा भने विवादका कारण मतगणना नै सुरु हुन सकेको छैन। पछिल्लो पटक उदयपुर १ मा नेपाली कांग्रेसका डा. नारायण खड्का विजयी भएका छन्। उनले नेकपा एमालेकी मञ्जु चौधरीलाई २ हजार ३७९ मतान्तरले पराजित गरेका हुन्। खड्काले ३१ हजार २७० र चौधरीले २८ हजार ८९१ मत प्राप्त गरे।

पछिल्लो नतिजासँगै मतगणना सकिएका १६१ क्षेत्रमध्ये कांग्रेस ५४, एमाले ४४, माओवादी केन्द्र १७ र एकीकृत समाजवादी १० ठाउँमा विजयी भएका छन्।

राष्ट्रिय स्वतन्त्र पार्टी, राप्रपा र जसपा सात सात ठाउँमा विजयी भएका छन्। स्वतन्त्र उम्मेदवारले ५ ठाउँमा जितेका छन्।

लोकतान्त्रिक समाजवादी पार्टी लोसपाले ४ ठाउँमा जितेको छ। नागरिक उन्मुक्ति पार्टीले ३ ठाउँमा जितेको छ। जनमत पार्टी, राष्ट्रिय जनमोर्चा र नेपाल मजदुर किसान पार्टीले एक एक ठाउँमा जितेका छन्।

समानुपातिकतर्फको मतगणना पनि अन्तिम चरणमा पुगेको छ। बुधबार बिहान ८ बजे निर्वाचन आयोगको वेबसाइटमा राखिएको विवरणअनुसार झण्डै एक करोड अर्थात् ९९ लाख ९३ हजार ५६८ मतगणना भइसकेको छ। कानुनअनुसार तीन प्रतिशतको थ्रेसहोल्ड कटाएर सात वटा पार्टीले सिट पाउने देखिएको छ। 

माधव नेपाल नेतृत्वको नेकपा एसले अझै थ्रेसहोल्ड कटाउन सकेको देखिन्न। हालसम्मको विवरणअनुसार एमाले र कांग्रेसबीच दुई सिटको अन्तर हुने देखिएको छ। एमालेले सबैभन्दा धेरै भोट ल्याएर सबैभन्दा बढी सिट जित्ने भएको छ। एमालेले ३४ सिट पाउनेछ। कांग्रेस र एमालेको सिट अन्तर दुई छ। कांग्रेसले हालको गणना अनुसार ३२ सिट पाउनेछ।

माओवादी भोट संख्यामा राष्ट्रिय स्वतन्त्र पार्टीभन्दा थोरै अघि भए पनि सिट संख्या भने दुवैको बराबर हुनेछ। दुवैले १४१४ सिट पाउनेछन्।

राप्रपाले ७ सिट पाउनेछ भने जसपाले ५ र जनमत पार्टीको ४ सिट कायम छ।

माधव नेपाल नेतृत्वको एकीकृत समाजवादी पार्टीले भने समानुपातिकतर्फको सिट नपाउने देखिएको छ। उसले २ लाख ८१ हजार ३४८ भोट ल्याएको छ। थ्रेसहोल्ड कटाउन गणना भएको मतअनुसार २ लाख ९९ हजार ८०८ मत ल्याउनुपर्छ। अर्थात् अझै १८ हजार ४६० मत नपुगेर थ्रेसहोल्ड पार गर्न सकेन नेकपा एसले।

थ्रेसहोल्ड कटाउन गणना भएको कुल सदर मतअनुसारको तीन प्रतिशत ल्याउनुपर्छ। त्यसैले नेकपा एसले अन्य स्थानमा ल्याएको थोरै मत हेर्दा यो संख्या पुर्‍याउन सक्नेमा शंका छ। यद्यपि गणना हुन बाँकी र पुनः मतदान हुने क्षेत्रहरुमा गठबन्धनले समानुपातिकमा कलमलाई एक छाप हानेर भोट संख्या बढाउन सक्ने झिनो सम्भावना भने बाँकी छ।