कैलालीमा देखियो रेशमको शक्ति

काठमाडौं– स्थानीय तह निर्वाचनमा कैलालीमा पहिलो दल बनेको नागरिक उन्मुक्ति पार्टी प्रतिनिधिसभा र प्रदेशसभामा पनि हिलो बन्ने संकेत देखिएको छ। ५ निर्वाचन क्षेत्र रहेको कैलालीमा ३ नम्बर क्षेत्रमा नागरिक उन्मुक्ति पार्टीले जित हासिल गरिसकेको छ।

१ र २ नम्बर क्षेत्रमा पनि नागरिक उन्मुक्ति पार्टीकै अग्रता रहेको छ। ती क्षेत्रमा प्रदेशसभामा पनि नागरिक उन्मुक्तिकै बहुमत आउने देखिएको छ। यो नागरिक उन्मुक्तिका लागि छोटो समयमा प्राप्त गरेको ठूलो सफलता हो।

१९ पुस २०७८ मा रेशम चौधरीले श्रीमती रञ्जिता श्रेष्ठको अध्यक्षतामा ‘नागरिक उन्मुक्ति पार्टी’ पार्टी गठन गरेका थिए। टीकापुर हत्याकाण्डका प्रमुख आरोपी रेशम चौधरी भने जेलमा छन्। तर, उनको पहलमा नै नागरिक उन्मुक्ति पार्टी गठन भएको हो। जेलभित्रैबाट रेशमले निर्देशनदायी भूमिका निर्वाह गरिरहेका छन्।

कैलाली निर्वाचन क्षेत्र नम्बर ३ मा नागरिक उन्मुक्ति पार्टीले ‘क्लिन स्वीप’ नै गरेको छ। यस क्षेत्रबाट प्रतिनिधिसभा सदस्यमा नागरिक उन्मुक्ति पार्टीका गंगाराम चौधरी निर्वाचित भएका छन्। 

गंगाराम २३ हजार १२० मतसहित विजयी हुँदा नेकपा माओवादी केन्द्रका कृष्णकुमार चौधरी १७ हजार ७४९ मतमा भए। उनी सत्ता गठबन्धनका उम्मेदवार हुन्।

नेकपा एमालेका गौरीशंकर चौधरी भने ९ हजार ८७४ मतसहित तेस्रो स्थानमा सीमित भए भने राष्ट्रिय प्रजातन्त्र पार्टीका बिरेन्द्र बमले ७ हजार ४७ मत प्राप्त गरे। कुल ६३ हजार ४४० मत खसेको उक्त क्षेत्रमा ४ हजार २१ मत बदर भएको छ।

यस्तै प्रदेश सभाको दुई वटै निर्वाचन क्षेत्रमा पनि नागरिक उन्मुक्ति पार्टीकै उम्मेदवार निर्वाचित भएका छन्। प्रदेश सभातर्फको क मा घनश्याम चौधरी विजयी भएका छन्। उनी १३ हजार ९२३ मत ल्याई विजयी भएका हुन्। उनका निकटतम प्रतिद्वन्द्वी नेपाली कांग्रेसका उम्मेदवार खेमराज डंगौरा थारु ११ हजार ५७२ मत ल्याएका थिए। 

प्रदेशसभातर्फको ख मा खुशीराम चौधरी ७ हजार ५३९ मतले विजयी भएका छन्। उनका निकटतम प्रतिद्वन्द्वी नेकपा एकीकृत समाजवादीका अमर साउदले ६ हजार ६१९ मत ल्याए।

कैलाली निर्वाचन क्षेत्र नम्बर पनि १ मा नागरिक उन्मुक्ति पार्टीकी उम्मेदवार रञ्जिता श्रेष्ठ चौधरीले अग्रता कायम राखेकी छन्। 

उनलाई नेपाली कांग्रेसका उम्मेदवार रामजनम चौधरीले पछ्याइरहेका छन्। कैलालीको निर्वाचन क्षेत्र नम्बर २ मा नागरिक उन्मुक्ति पार्टीका उम्मेदवार अगाडि रहेका छन्। प्रतिनिधिसभा सदस्यमा नागरिक उन्मुक्ति पार्टीका अरुणकुमार चौधरीले अग्रता लिइरहेका छन्।

नेकपा माओवादी केन्द्रका भगतबहादुर बडुवाल उनका निकटतम प्रतिस्पर्धी रहेका छन्। कैलाली क्षेत्र नम्बर १ र २ का प्रदेशसभातर्फ पनि उन्मुक्ति पार्टीकै उम्मेदवारले लिड गरिरहेका छन्।

कैलालीमात्र नभएर बर्दियामा समेत नागरिक उन्मुक्ति पार्टीले आफ्नो प्रभाव विस्तार गरेको छ। बर्दिया क्षेत्र नम्बर २ बाट स्वतन्त्र उम्मेदवारी दिएका रेशमका बुवा लालवीर चौधरी निर्वाचित भएका छन्। 

लालवीरसँग माओवादीका सुरेश पन्थ १३५ मतले पराजित भएका हुन्।