कैलाली-३ मा नागरिक उन्मुक्तिको 'क्लीन स्वीप'

काठमाडौं– कैलाली ३ मा रेशम चौधरी संरक्षक रहेको नागरिक उन्मुक्ति पार्टीले क्लीन स्वीप गरेको छ। प्रतिनिधिसभासहित यहाँ प्रदेशसभाका दुवै क्षेत्रमा नागरिकले जित निकालेको हो।

मंगलबार सम्पन्न प्रतिनिधिसभाको निर्वाचनको मतगणनामा यहाँबाट गंगाराम चौधरी विजयी भएका थिए। चौधरी २३ हजार १२० मतसहित विजयी हुँदा उनका निकटतम् प्रतिद्वन्द्वी नेकपा माओवादी केन्द्रका कृष्णकुमार चौधरीले १७ हजार ७४९ मत पाएका थिए।

२०७४ सालमा निर्वाचित नेकपा एमालेका गौरीशंकर चौधरी यहाँ प्रतिस्पर्धामै आउन सकेका थिएनन्। उनको प्रतिस्पर्धा तेस्रोमा राप्रपासँग भएको थियो।

बुधबार सम्पन्न प्रदेशसभाको मतगणनामा ३ 'क'मा  घनश्याम चौधरी र 'ख' मा खुसीराम चौधरी विजयी भएका छन्। घनश्यामले १३ हजार ९२३ मत पाउँदा उनका सुदूर प्रतिद्वन्द्वी नेकपा एमालेका राजबहादुर बुढाले ४ हजार६३१ मत पाएका छन्। यस्तै खुसीरामले ७ हजार ५३९ मत पाएकोमा सत्ता गठबन्धनका उम्मेदवार अमर साउँदले ६ हजार ६१९ मत पाएका छन्।

बर्दिया २ मा उन्मुक्तिको समर्थनमा रेशम चौधरीका पिता स्वतन्त्र उम्मेदवार लालवीर चौधरी विजयी भएकोमा कैलाली १ सहित बर्दिया १ मा पनि उन्मुक्तिको अग्रता कायम छ। कैलाली २ मा मंगलबार रातिसम्म उन्मुक्तिले निरन्तर अग्रता लिएकोमा त्यसयता माओवादीका भगतबहादुर बडुवालले उन्मुक्तिका अरुण चौधरीलाई पछि छाडेका छन्।