गुल्मीमा जिप दुर्घटना हुँदा ५ जनाको मृत्यु

काठमाडौं– गुल्मीको सत्यवती गाउँपालिका वडा–३ कुढडाँडामा जिप दुर्घटना हुँदा ५ जनाको मृत्यु भएको छ।

दुर्घटनामा परी ४ जना घाइते भएको जिल्ला प्रहरी कार्यालय गुल्मीले बताएको छ।

दुर्घटनामा परी सत्यवतीका ५१ वर्षीय झलक सोमै, ३३ वर्षीया जमुना सोमै, ५५ वर्षीय टीका राहादी, ३० वर्षीय मिलन तमारो, ४७ वर्षीय रणबहादुर सिंजापतिको मृत्यु भएको हो।

ठूलोलुम्पेबाट कुढडाँडा जाँदै गरेको लु३च ५३४० नम्बरको जिप गए राती २ बजे एक्कासि ब्रेक फेल भई सडकबाट २ सय मिटर तल भीरमा खसेको प्रहरीले जनाएको छ।

ज्वाङ खैरेनी इलाका प्रहरी कार्यालयबाट प्रहरीको टोली घटनास्थल पुगेको छ। इलाका प्रहरी कार्यालयबाट घटनास्थल ३२ किलोमिटर टाढा  छ।

रातीको समय दुर्घटना भएकाले मृतक तथा घाइतेको उद्दार हुन सकेको थिएन। दुर्घटना भएको खबर बुधबार बिहान स्थानीयले  प्रहरीलाई खबर गरेका थिए।