मालपोतका पूर्व उपसचिवविरुद्ध २१ लाखको भ्रष्टाचार मुद्दा

काठमाडौं– सरकारी जग्गा व्यक्तिको नाममा नामसारी गरेर भ्रष्टाचार गरेको आरोपमा अख्तियार दुरुपयोग अनुसन्धान आयोगले मालपोत कार्यालय डिल्लीबजारका पूर्व उपसचिव परशुराम अधिकारीविरुद्ध मुद्दा दायर गरेको छ।

उनले काठमाडौं महानगरपालिका–१६ को कित्ता नम्बर १३९९ को ९१.३१ वर्गमिटर जग्गा सरकारको स्वीकृतिविना भक्तरत्न तुलाधरको नाममा कायम हुने गरी निर्णय गरेको अख्तियारको दाबी छ। अख्तियारले उनीसँग २१ लाख ३० हजार ३८१ रुपैयाँ बिगो माग गर्दै भ्रष्टाचार मुद्दा दायर गरेको हो।

तत्कालिन मालपोत अधिकृत सीताराम पोखरेल, तत्कालिन नायब सुब्बा ताराप्रसाद जोशी र पर्शुराम भुसाल र जग्गाधनी बन्ने भक्तरत्न तुलाधरविरुद्ध पनि अख्तियारले मुद्दा दायर गरेको छ।