प्रदेश-१ : सबै केन्द्रमा सकियो मतदान, ६० प्रतिशत खसेको अनुमान

विराटनगर– प्रदेश १ मा करिब ६० प्रतिशत मत खसेको अनुमान गरिएको छ। साँझ ५ बजेसम्म करिब ६० प्रतिशत मत खसेको प्रारम्भिक अनुमान गरिएको प्रदेश निर्वाचन कार्यालयका प्रमुख लेवनकश्यप अधिकारीले जानकारी दिए।

खसेको मतको अन्तिम विवरण संकलनको काम भइरहेको उनले बताए। अधिकारीका अनुसार प्रदेशभर कतैपनि पनि मतदान स्थगित भएन। ‘छिटपुट घटना भएका स्थानहरुमा पनि मतदान सुरु गरिएको थियो,’ उनले भने। 

प्रदेशमा १ हजार ८ सय ९७ वटा मतदानस्थल र ४ हजार ९९ वटा मतदान केन्द्र रहेका थिए। मतदान सम्पन्न गराउन प्रदेशमा ३२ हजार ७९२ जना कर्मचारी र १६ हजार ३९६ जना स्वयंसेवक परिचालन गरिएको निर्वाचन कार्यालयले जनाएको छ।

यस्तै सुरक्षाका लागि प्रदेश १ मा नेपाल प्रहरी र म्यादी ३१ हजार १२२ जना परिचालन भएका छन्।