बाँकेको मत तीन स्थानमा गणना गर्ने तयारी

बाँके- आइतबार साँझ ५ बजे निर्वाचन सकिएपछि मतपेटिका संकलन गरी बाँकेमा तीन स्थानमा गणना गर्ने तयारी गरिएको छ। जिल्ला निर्वाचन कार्यालय बाँकेका अनुसार तीन वटा क्षेत्रको गणना फरकफरक तीन स्थानमा गर्न लागिएको हो। 

बाँके क्षेत्र नम्बर १ को राप्तीसोनारी गाउँपालिका अगैया, २ नम्बर क्षेत्रको भेरी प्राविधिक शिक्षालय नेपालगञ्ज र क्षेत्र नम्बर ३ को खजुरास्थित कपास विकास कार्यालयमा गणना हुनेछ।

मतदान सकिए लगत्तै तिनै क्षेत्रमा मतपेटिका लगेर आवश्यक तयारी गरेपछि मतगणना सुरु हुने निर्वाचन कार्यालय बाँकेकी प्रमुख रमा पन्तले बताइन्। 

बाँकेमा ३ लाख ३२ हजार २ सय ३१ जना मतदाता छन्। जिल्लाका १ सय ३८ वटा मतदानस्थलमा मतदान भइरहेको छ।