थबाङले पुन: चुनाव बहिष्कार गरेको हो?

माओवादी नेताहरुले जनयुद्धको रणनीति बनाएको, सशस्त्र द्वन्द्वको बेला माओवादीको आधार इलाका रहेको क्षेत्र हो रोल्पाको थबाङ। थबाङलाई आधार बनाएर सुरु भएको जनयुद्ध देशैभरि फैलिएर १० वर्षसम्म चलेको थियो। त्यसैले बिद्रोहीको भूमि भनेर चिनिन्छ-थबाङ। 

माओवादी आधार इलाका मानिने थबाङले २०७० को दोस्रो संविधानसभा निर्वाचन बहिष्कार गरेको थियो। तर ०७४ मा भने थबाङ पुन: मतदानमा सहभागी भएको थियो।

आइतबार देशैभर आठौँ आम निर्वाचनका लागि मतदान चलिरहँदा सामाजिक सञ्जालमा थबाङले भने पुन: चुनाव बहिष्कार गरेको हल्ला फैलियो। सामाजिक सञ्जालमा विभिन्न पेज र व्यक्तिगत अकाउन्टमार्फत पोस्ट गरिएका स्टाटसमा दिउँसो २ बजेसम्म थबाङमा एउटा पनि मत नखसेको दाबी गरिएको छ। 

तर थबाङले पुन: चुनाव बहिष्कार गरेको भनी सामाजिक सञ्जालमा आएका पोस्टहरु अफवाह मात्रै भएको जिल्ला निर्वाचन आयोगको कार्यालयले जनाएको छ। जिल्ला निर्वाचन अधिकृत पदम बहादुर डाँगीले दिउँसो २ बजेसम्म करिब ३५ प्रतिशत मत खसिसकेको दाबी गरे। 

"सामाजिक सञ्जालमा थबाङमा मत नखसेको भन्दै भाइरल भइरहेका पोस्ट मैले पनि देखेँ, तर त्यो मिथ्या हो। यहाँ शान्तिपूर्ण मतदान चलिरहेको छ," उनले भने, "सर्भरले काम नगरेकाले ठ्याक्कै यति नै मत खस्यो भन्न सक्ने अवस्था छैन, तर करिब ३५ प्रतिशत मत खसिसकेको छ।"