मतपत्रमा 'रुख' नभेटिएपछि मेचीनगरमा रोकिएको मतदान फेरि सुरु

काठमाडौं- झापा क्षेत्र नम्बर १ मेचीनगर नगरपालिका वडा नम्बर १४ स्थित बालसुबोधनी माध्यमिक विद्यालय मतदान केन्द्रमा प्रतिनिधि सभातर्फ रुख चिह्न नभएको मतपत्र भेटिएपछि उत्पन्न भएको विवाद साम्य भएको छ। मतपत्रमा नेपाली कांग्रेसको चिह्न नै नभेटिएपछि मतदान प्रक्रिया रोकेर विवाद सुल्झाइएको निर्वाचन कार्यालय झापाका प्रमुख तुलसीकुमार नेपालले जानकारी दिए। 

प्रतिनिधिसभा प्रत्यक्षतर्फको मतपत्र हुनुपर्नेमा प्रदेश सभातर्फको मतपत्रमा मतदान गराएपछि विवाद उत्पन्न भएको थियो। मतपत्र साटिएर फरक परेपनि १९ जनाले मतदान गरिसकेका थिए। उनीहरूले मतदान गरेको जानकारी पाएपछि कांग्रेसका कार्यकर्ताले आक्रोशित बनेका थिए। मतपत्रको दोस्रो बन्डल सकिएपछि तेस्रोमा प्रतिनिधिसभाको मतपत्र हुनुपर्नेमा प्रदेश सभातर्फको बन्डल झिकेर मतदान गराउँदा रुख नभेटिएको हो। 

नेपालका अनुसार विवाद सुल्झाउनका लागि यसअघि मतदान गरेका १९ जनालाई फेरि मताधिकार दिने सहमति भएको छ। नेपाली कांग्रेसबाट झापा-१ महामन्त्री विश्वप्रकाश शर्मा उम्मेदवार छन्।