काठमाडौंका दुई कारागारमा सकियो मतदान, कैदीबन्दी उत्साहित

काठमाडौं- काठमाडौंका दुई कारागारमा मतदान सकिएको छ। देशका कैदीबन्दीलाई पहिलो पटक मताधिकार दिइएको मतदान केन्द्रमा खटिएका कर्मचारीहरूले पनि मतदान गरेका थिए। बिहान ७ बजेबाट सुरु गरिएको मतदान दिउँसो १२ बजेमसम्ममा सम्पन्न भएको सम्बन्धित कारागारका मतदान अधिकृतहरूले जानकारी दिएका छन्। 

निर्वाचन आयोगका अनुसार डिल्लीबजार कारागारबाट ११० जना कैदीबन्दी मतदान गर्न योग्य थिए। सो केन्द्रमा खटिएका १३ जना कर्मचारी पनि अस्थायी मतदाता सूचीमा समावेश थिए। १२३ जना योग्य मतदाता भएको केन्द्रबाट ११३ जनाले मतदान गरेको मतदान अधिकृत बसन्त पुरीले जानकारी दिए। 'मतदान बाँकी व्यक्तिहरू मतदान अवधिमा उपस्थित हुन नसक्ने भएकाले मतपेटिका लिनका लागि मुख्य निर्वाचन अधिकृतको कार्यालयलाई खबर गरिएको छ,' पुरीले भने। यहाँको मतपेटिका काठमाडौं क्षेत्र नम्बर ४ निर्वाचन अधिकृतको कार्यालयमा पठाउने तयारी गरिएको छ। 

यही कारागारबाट नागरिक उन्मुक्ति पार्टीका रेशम चौधरी, सिभिल ग्रुपका पूर्वअध्यक्ष तथा एमालेका पूर्वसांसद इच्छाराज तामाङ र शोभाकान्त ढकालले पनि मतदान गरेका थिए। जेलमा बसेर पनि मत हाल्न पाउँदा मतदाताहरू उत्साहित भएको आफूले पाएको पुरीले बताए। कारागारमा मतदान गर्न पाउँदा आफूलाई खुशी लागेको चौधरीले प्रतिक्रिया दिए। 

यस्तै काठमाडौंकै केन्द्रीय कारागारबाट जगन्नाथदेवलबाट २० जनाले मतदान गरेका छन्। यो केन्द्रमा खटिएबाट ७ जना कैदीबन्दीले मतदान गरेको मतदान अधिकृत ईश्वरीप्रसाद पाण्डेले जानकारी दिए। सोही केन्द्रबाट ‍१३ जना कर्मचारीले पनि मतदान गरेका थिए। दुवै केन्द्रबाट मतदान गर्नेमा महिला भने छैनन्। यहाँको मतपेटिका काठमाडौं क्षेत्र नम्बर १ निर्वाचन अधिकृतको कार्यालयमा पठाउने तयारी गरिएको छ।   

उपत्यकामा काठमाडौंका दुई सहित ललितपुरको एक कारागारमा रहेका कैदीबन्दीमध्ये १८२ जना मतदान गर्न योग्य थिए। केन्द्रीय कारागार कार्यालय जगन्नाथलेवलमा ३ हजार ४ सय, डिल्लीबजार कारागारमा ६५० र कारागार कार्यालय ललितपुरमा १ हजार ४ सय २० भन्दा बढी कैदीबन्दी छन्। 

प्रतिनिधिसभा र प्रदेशसभा सदस्य निर्वाचनमा पहिलो पटक कारागारमा रहेका कैदीबन्दीले मताधिकारको प्रयोग गरेका हुन्। देशभरका ४ लाख ५० हजार 'अस्थायी मतदाता'का लागि १४१ मतदान केन्द्र निर्धारण गरिएको छ। अस्थायी मतदाताले प्रतिनिधि सभा समानुपातिकमा मात्र मतदान गर्न पाउँछन्। यसअघि निर्वाचन गराउन खटिएका कर्मचारी र सुरक्षाकर्मीलाई मात्र प्रतिनिधि सभा समानुपातिकमा मतदान गर्ने व्यवस्था थियो।