उद्योगी–व्यवसायीले पनि गरे उत्साहका साथ मतदान, आर्थिक समृद्धिको अपेक्षा

काठमाडौं– प्रतिनिधिसभा र प्रदेशसभा सदस्यका लागि आज देशभर मतदान भइरहेको छ। उद्योगी–व्यवसायीहरुले विभिन्न स्थानबाट मतदान गरेका छन्। 

मतदान गरिसकेपछि उनीहरुले निर्वाचनपछि बन्ने सरकारले आर्थिक क्षेत्रको उन्नयनका लागि काम गरोस् भन्ने अपेक्षा रहेको बताएका छन्। नेपाल उद्योग वाािणज्य महासंघका अध्यक्ष शेखर गोल्छाले काठमाडौं निर्वाचन क्षेत्र नम्बर ८ को सीतापाइला माविस्थित मतदान केन्द्रबाट मतदान गरेका छन्। मतदानपछि सञ्चारकर्मीहरुसँग कुरा गर्दै उनले देशको समृद्धि र सुशासनको पक्षमा काम गर्ने उम्मेदवारलाई मतदान गर्न आग्रह गरे। 

अध्यक्ष गोल्छाले देशलाई परिवर्तन गर्न सक्ने नेतृत्वको चयनका लागि सबै उपस्थित भएर मतदान गर्न आग्रह गरेका थिए। त्यस्तै, सोही स्थानबाट नेपाल अटोमोबाइल एसोसिएसनका पूर्वअध्यक्ष कृष्ण प्रसाद दुलालले पनि मतदान गरेका छन्।  

महासंघका वरिष्ठ उपाध्यक्ष चन्द्र ढकालले काठमाडौंको विशालनगरमा रहेको मतदान केन्द्रमा पुगेर आफ्नो मत खसालेका छन्। त्यसैगरी महासंघका पूर्वअध्यक्ष एवं उद्योगी पशुपति मुरारकाले काठमाडौंको थापाथलीबाट मतदान गरेका छन्। भोट हालिसकेपछि उनले यसपालिको आफ्नो भोटले आर्थिक क्रान्ति ल्याउने विश्वास रहेको प्रतिक्रिया दिए।

नेपाली कांग्रेसका उम्मेदवारसमेत रहेका व्यवसायी उमेश श्रेष्ठले चितवन क्षेत्र नम्बर २ को मतदान केन्द्रमा मतदान गरेका छन्। कांग्रेसका उम्मेदवारहरुको प्रचारमा खटिएका राष्ट्रिय योजना आयोगका पूर्वउपाध्यक्ष एवम् अर्थशास्त्री स्वर्णिम वाग्लेले गोरखाको सहिद लखन गाउँपालिकामा रहेको श्री रामेश्वरी माध्यमिक विद्यालय पुगेर मतदान गरेका छन्। 

उनले फेसबुकमा विगत ३१ वर्षदेखिका निर्वाचनहरुमा सहभागी वा चासो राख्दै आएकोमा यसपटक जनतामा निकै कम उत्साह देखिएको स्टाटस लेखेका छन्। जनतामा वितृष्णा रहेको र सोझो गठजोड भन्दा फरक नतिजा आउने आकलन गर्दै उनले आइतबारको निर्वाचनले राजनीति सुधार्न बाध्य पार्ने नयाँ विन्दुमा पुग्छौ कि भन्दै स्टाटस लेखेका हुन्। 

अर्का उद्योगपति तथा कांग्रेसबाट प्रतिनिधिसभा सदस्यका उम्मेदवार विनोद चौधरीले नवलपरासी (बर्दघाट सुस्ता पूर्व) १ बाट मतदान गरेका छन्।