चुनाव गराउन मोरङमा १३ हजार जनशक्ति परिचालन

मोरङ- प्रतिनिधि तथा प्रदेशसभा निर्वाचन सम्पन्न गराउन मोरङमा १३ हजारभन्दा बढी जनशक्ति परिचालन गरिएको छ। निर्वाचन सम्पन्न गराउन ७ हजारभन्दा बढी सुरक्षाकर्मी र ६ हजारभन्दा बढी कर्मचारी परिचालन गरिएको हो। 

‘म्यादी र नेपाल प्रहरीलाई सम्बन्धित मतदानस्थल तथा मतदान केन्द्रमा खटाइसकिएको छ,’ प्रमुख जिल्ला अधिकारी काशीराज दाहालले भने, ‘नेपाली सेना र सशस्त्र प्रहरीलाई पनि आआफ्नो जिम्मेवारीसहित चुनाव केन्द्रित गरिएको छ।’ 

मतदाता, उम्मेदवार र निर्वाचनमा खटिने कर्मचारीको सुरक्षामा कुनै कमजोरी हुन नदिने उनको भनाइ छ। भारतसँग सीमा जोडिएको नेपाल–भारत सीमा क्षेत्रमा ठूलो संख्यामा सुरक्षाकर्मी परिचालन गरिएको छ। 

सीमामा दुई देशका सुरक्षाकर्मीको गस्ती बढाइएको छ। निर्वाचन नसकिएसम्म भारतसँग सीमा जोडिएको मोरङको ६३ किलोमिटर क्षेत्रलाई सुरक्षाकर्मीले उच्च निगरानीमा राख्ने र आवश्यक सुरक्षाको प्रबन्ध मिलाइने मोरङ प्रहरी प्रमुख एसपी शान्तिराज कोइरालाले जानकारी दिए। 

मतदानस्थल ३०६ वटा रहेको मोरङमा ८ सय ३९ वटा स्थायी र २ वटा अस्थायी मतदान केन्द्र छन्। मोरङमा ७ लाख ३५ हजार ५ सय २५ मतदाता छन्। जसमा ३ लाख ७४ हजार ३ सय २६ पुरुष र ३ लाख ६१ हजार १ सय ९३ महिला छन्।

मोरङमा ६ प्रतिनिधिसभा र १२ प्रदेशसभा निर्वाचन क्षेत्र छन्।