चमेलिया पुलमा राखिएको 'प्रेसर कुकर बम' सेनाद्वारा निष्क्रिय

दार्चुला- सडक मार्गबाट दार्चुला प्रवेश गर्ने चमेलियामाथिको पुलमा शनिबार बिहान प्रेसर कुकर बम फेला परेको छ। उक्त बमलाइ सेनाको टोलीले निष्क्रिय गरेको प्रहरीले जनाएको छ।

शनिबार बिहानै साढे २ बजेतिर उक्त प्रेसरकुकर बमजस्तै देखिने शंस्कापद वस्तु भएको यात्रुहरूले देखेका थिए। प्रहरीलाई जानकारी हुनेबित्तिकै इलाका प्रहरी चौकी गोकुलेश्वरबाट टोली खटिएको थियो। सेनाको टोलीले बिहान ७ बजे उक्त बम निष्क्रिय पारेको जिल्ला प्रहरी कार्यालयका डीएसपी तर्कराज पाण्डेयले बताए।

प्रेसरकुकर माटो भरेको र बाहिर टेपले बेरेर तार निकालेको अवस्थामा भेटिएको उनले जानकारी दिए। उक्त प्रेसरकुकर कसले राख्यो भन्नेबारेमा अनुसन्धान भइरहेको प्रहरीको भनाइ छ।