भेलुबाजेलाई २ हजार दिएकोबारे सूर्य थापालाई आयोगले सोध्यो स्पष्टीकरण

काठमाडौं- निर्वाचन आयाेगले प्यूठान जिल्लाबाट नेकपा एमालेका तर्फबाट प्रतिनिधि सभा सदस्यका उम्मेदवार सूर्य बहादुर थापालाई पुन:  स्पष्टीकरण साेधेकाे छ। मीनबहादुर बुढा (भेलुबाजे) लाई रु दुई हजार दिई आफ्नो निर्वाचन प्रचारप्रसार गराएको भन्दै स्पष्टीकरण सोधेको हो। 

निर्वाचन (कसूर तथा सजाय) ऐन, २०७३ को दफा २१ को उपदफा (१) मा उम्मेदवारले कुनै मतदातालाई नगद दिन नहुने उल्लेख छ। निर्वाचन आचारसंहिता, २०७९ को दफा १३ को उपदफा (१) को खण्ड (झ) मा उम्मेदवारलगायतले नगद वा जिन्सी वितरण गर्ने घोषणासमेत गर्न नहुने व्यवस्था छ। यो व्यवस्था पालना नभएको भन्दै थापालाई आयोगले स्पष्टीकरण सोधेको हो। 

'तपाईंले मीनबहादुर बुढा (भेलुबाजे) लाई नगद वितरण गर्नु भएको हो, होईन? तपाईंले निज मीनबहादुर बुढा (भेलुबाजे) लाई नगद रकम वितरण गरेको भए निर्वाचन आचारसंहिताको उल्लंघनमा तपाईंलाई किन कारवाही हुनु नपर्ने हो? यो पत्र प्राप्त भएको २४ घण्टाभित्र निर्वाचन आयोगको इमेल ठेगानामा वा जिल्ला निर्वाचन कार्यालय प्यूठानमा प्राप्त हुने गरी लिखित स्पष्टीकरण पेस गर्नुहुन निर्णयानुसार निर्देशन दिइएकाे छ,' आयोगले सोधेको स्पष्टीकरणमा उल्लेख छ।