लमहीको अर्जुनखोलामा पौडी खेल्ने क्रममा डुबेर दुई बालकको मृत्यु

दाङ- दाङमा डुबेर दुईजनाको मृत्यु भएको छ। लमही नगरपालिका वडा नम्बर ६ स्थित अर्जुनखोलामा पौडी खेल्ने क्रममा डुबेर दुई बालकको मृत्यु भएको सशस्त्र प्रहरी बल नेपाल ४१ नम्बर रिजर्भ गण अर्जुनखोलाका प्रहरी नायब निरीक्षक प्रकाश जैसी ढकालले जानकारी दिए।

दिउँसो पाँच जना साथी मिलेर नुहाउन गएका थिए, जसमध्ये दुई जनाको मृत्यु भएको हो। लमही नगरपालिका ४ अर्नहवा निवासी १३ वर्षिय ललित परियार र १० वर्षिय अजित बिकको डुबेर मृत्यु भएको हो।

नुहाउने क्रममा बालक डुबेको खबर पाएलगत्तै सशस्त्र प्रहरी नायब निरीक्षक ढकालको कमान्डमा तालिमप्राप्त सुरक्षाकर्मी खोज तथा उद्धारमा खटिएका थिए। जीवित उद्धारको प्रयास गरिए पनि सकिएन। बालकको शव लमही अस्पतालमा राखिएको छ।