आज महानगरको डोजर वीर अस्पताल परिसरका औषधि पसलमा चल्ने

काठमाडौं- काठमाडौं महानगरपालिकाले वीर अस्पताल परिसरको औषधि पसल रहेका सटरहरू आज डोजर चलाउने भएको छ। महानगरले नियम विपरित सञ्चालनमा रहेका औषधि पसल भत्काउन २४ घण्टे चेतावनी दिएको थियो। 

काठमाडौं महानगर प्रहरीले बुधबार दिउँसो २४ घण्टाभित्र टहरा भत्काउन चेतावनी दिँदै माइकिङ गरेको थियो। वर्षादेखि अवैध रूपमा सटरमा औषधि पसल सञ्चालन भइरहेको वीर बताइएको छ। 

अस्पतालको नयाँ भवन परिसरमा रहेको सो क्षेत्रमा नक्सा पास गर्दा बगैंचा बनाउने उल्लेख रहेको छ। बगैँचामा सटरसहितको टहरा बनाएकोले आज हटाउन लागिएको महानगरले जनाएको छ।

कामपा प्रहरी प्रमुख (एसपी) राजुनाथ पाण्डेले वडा अध्यक्षले ती सटर भत्काउन कामपा प्रहरीलाई आग्रह गरेको जानकारी दिए। सबै विवरण बुझेर सटर भत्काउने निर्णय गरिएको उनले बताए।

काठमाडौं महानगर प्रहरीले वडा नम्बर २७ को वडा कार्यालयको सिफारिसमा ८ वटा सटर भत्काउन लागेको जनाएको छ।