रुपन्देही–२ बाट एमाले उपाध्यक्ष विष्णु पौडेल एकल सिफारिस

बुटवल– नेकपा एमाले रुपन्देहीले निर्वाचन क्षेत्र नम्बर २ बाट प्रतिनिधिसभा सदस्यको उम्मेदवारका लागि विष्णु पौडेलको एकल नाम सिफारिस गरेको छ। एमाले क्षेत्रीय कमिटीको आइतबार बसेको बैठकले पार्टीका उपाध्यक्षसमेत रहेका पौडेलको नाम सर्वसम्मत रूपमा सिफारिस गरेको हो।

पौडेल २०६४ सालमा सम्पन्न पहिलो संविधानसभा निर्वाचनदेखि निरन्तर रुपमा यही क्षेत्रबाट निर्वाचित हुँदै आएका छन्। पौडेलले २०६४, २०७० र २०७४ को निर्वाचनमा क्रमशः भक्ति पाण्डे, बाबुराम भट्टराई र सूर्यप्रसाद प्रधान तथा २०७४ मा कांग्रेसका युवराज गिरीलाई हराएका थिए। 

२०४८ सालको निर्वाचनमा यो क्षेत्रबाट कांग्रेसका बालकृष्ण खाण विजयी भएका थिए भने २०५१ सालमा एमालेका मोदनाथ प्रश्रितले खाणलाई हराएका थिए। पौडेलमात्रै यस्तो नेता हुन् जो रुपन्देहीको क्षेत्र नम्बर २ (०७४ अघिसम्म निर्वाचन क्षेत्र ४)  लगातार ३ पटक निर्वाचन जित्न सफल भए। 

लगातार जित हासिल गरेकै कारण आफ्नो निर्वाचन क्षेत्रलाई ‘एमाले लाल किल्ला’ का रुपमा उनले परिचित समेत बनाएका थिए। तर, गत वैशाख ३० गते सम्पन्न स्थानीय तहको निर्वाचनमा पाँच दलीय गठबन्धनले ‘एमाले किल्ला’ भत्काइदिएको छ। पौडेलको निर्वाचन क्षेत्रमा गठबन्धनबाट प्रतिनिधिसभामा को उठ्छ भन्ने टुंगिएको छैन ।