शेखर कोइरालासँग पोलिटिकल कुरा भयो, गठबन्धन भनेपछि इरिटेड हुन्छ : ओली

विराटनगर– नेकपा एमालेका अध्यक्ष केपी शर्मा ओलीले नेपाली कांग्रेसका नेता डा. शेखर कोइरालासँग ‘पोलिटिकल’ कुरा भएको बताएका छन्। उनले आफूहरुबीच ‘पोलिटिकल’ बाहेक अरु कुरा नभएको बताए। 

शुक्रबार एमाले निकट विद्यार्थी संगठन अनेरास्ववियुको प्रदेश स्तरीय प्रशिक्षणका लागि विराटनगर आएका अध्यक्ष ओलीले पत्रकारसँगको संक्षिप्त कुराकानीमा सो कुरा बताएका हुन्। तपाईंहरुबीच गठबन्धन गर्ने कुरा भएको हो? भन्ने जिज्ञासामा उनले भने,‘ गठबन्धन भन्नेबित्तिकै इरिटेड हुन्छ।’ 

सत्तारुढ पाँच दलिय गठबन्धनबीच भागबन्डा विवाद नमिलिरहेका बेला कांग्रेस नेता कोइराला र ओलीबीच बिहीबार करिब दुई घण्टा ‘वान वान टु वान’ छलफल भएको थियो। उनले दुईजनाबीचको कुराकानीको विषय सुनाउन चाहेनन्। 

प्रशिक्षण कार्यक्रममा अध्यक्ष ओलीले देशभरि नै हरेक दिन एमालेको संख्या बढ्दै गएको बताए। सत्तारुढ पार्टी छाडेर एमालेमा प्रवेश गर्नेको लहर चलेको उनको दाबी थियो। अध्यक्ष ओलीले भने, ‘जनताको भेल अहिले एमालेमा जम्मा हुने क्रम बढेको छ।’ विद्यार्थी संगठन अनेरास्ववियुको उचाइ गठबन्धन दलका विद्यार्थी संगठनहरु भन्दा धेरै माथि रहेको उनको दावी छ। उनले भने,‘ गठबन्धन दलका विद्यार्थी संगठनहरु सबै एकातिर हुँदा पनि अनेरास्ववियु नै बढी हुन्छ।’

आगामी मंसिर ४ पछि जनताले राष्ट्रिय फैसला गर्ने भएकाले जनताको मतको रक्षा गर्न अहिल्यैदेखि जुट्न उनले पार्टीका नेता कार्यकर्तालाई आग्रह गरे। अध्यक्ष ओलीले भने,‘ मतपेटिकाको रक्षा गर्नका लागि अहिलेदेखि नै तयारी गर्नुहोस्।’

अनेरास्ववियुको दुई दिने प्रशिक्षण कार्यक्रममा १४ जिल्लाबाटै विद्यार्थी नेताहरुको सहभागिता रहेको छ। प्रदेश प्रशिक्षण कार्यक्रम दुई दिनसम्म चल्ने अनेरास्ववियुका केन्द्रीय उपमहासचिव भास्कर खनालले बताए।