आफ्नै टिपरमा आगो लगाउने समातिए

काठमाडौं- बिमा रकम दाबी गर्न आफ्नै टिपरमा आगजनी गर्नेलाई प्रहरीले पक्राउ गरेको छ। दाङको घोराहीमा मंगलबार टिपर जलाउने तीन जनालाई पक्राउ गरी सार्वजनिक गरेको हो।

घोराही–लमही सडक खण्डअन्तर्गत घोराही उपमहानगरपालिका-३ बबई खोला पुल नजिक रा १ ख १६९४ नम्बरको टिपरमा आज बिहान आगजनी भएको थियो। 

विभिन्न चार राजनीतिक दलले आह्वान गरेको नेपाल बन्दको मौका छोपी गाडीधनी घोराही–१८ का ४३ वर्षीय धनेश्वर भण्डारीले जीर्ण भएको टिपरमा चालक र सहचालकलाई आगो लगाउन लगाएको खुलेको  छ। गाडीमा डिजेल खन्याएर आगो लगाएको पुष्टि भएपछि गाडीधनी भण्डारीका साथै चालक राप्ती गाउँपालिका-८ पिपरीका ३२ वर्षीय अरुण चौधरी र सहचालक गढवा गाउँपालिका-७ चन्दनपुरका १७ वर्षीय आकाश चौधरीलाई पक्राउ गरिएको प्रहरीले जनाएको छ।

उनीहरुविरुद्ध मुलुकी अपराध संहिता २०७४ को दफा २५३ को उपदफा १ र २ बमोजिम आपराधिक लाभ शीर्षकमा मुद्दा दर्ता गरी अनुसन्धान गरिने प्रहरीलर् जानकारी दिएको छ। यो कसुरमा१ वर्षसम्म कैद र १० हजार रुपैयाँसम्म जरिवाना हुनेछ।