प्यूठानको कुडुलेमा पल्टियो जीप, ९ घाइते

दाङ– प्यूठानको सरुमारानी गाउँपालिका–४ कुडुलेमा जीप दुर्घटना हुँदा ९ जना घाइते भएका छन्। दाङको भालुवाङबाट प्युठानको बाग्दुलातर्फ जाँदै गरेको लु२ख ३५६९ नम्बरको जीप सरुमारानी गाउँपालिका–४ कुडुलेमा दुर्घटनामा परेको हो।

घाइतेमध्ये १ जनाको अवस्था गम्भीर र अन्य ८ जना घाइते भएको जिल्ला प्रहरी कार्यालय प्युठानले बताएको छ। घाइतेमध्ये ६ जनालाई उपचारका लागि बुटवल पठाइएको छ। बाँकी तीन जनाको प्युठानको साझा पोलिक्लिनमा उपचार भइरहेको प्रहरीले जनाएको छ।

ब्रेक फेल हुँदा अनियन्त्रित भई जीप दुर्घटनाग्रस्त भएको प्रहरीले बताएको छ। सडकबाट करिब २० मिटर तल खसेको जीपमा चालकसहित १४ सवार थिए।