पहिरोले मध्यपहाडी लोकमार्गको रुकुमपूर्व खण्ड अवरुद्ध

रुकुम- रुकुम(पूर्व) को भूमे गाउँपालिका–३ दोमैमा पहिरो खस्दा मध्यपहाडी लोकमार्ग अवरुद्ध भएको छ। सडक माथिबाट ठूलो पहिरो खस्दा उक्त सडक अवरुद्ध भएको हो। 

जिल्ला प्रहरी कार्यालय रुकुम(पूर्व) का प्रहरी नायब उपरीक्षक प्रकाश डाँगीका अनुसार सडकमा पहिरोसँगै ठूलठूला ढुङ्गासमेत झरेका छन्। तत्काल पहिरो हटाउन सम्भव नभएको डाँगीले बताए। 'भोलि बिहानैदेखि पहिरो पन्छाउँछौँ', उनले भने। सडक अवरुद्धपछि यात्रु बाटोमै अलपत्र परेका छन्। 

मध्यपहाडी लोकमार्ग हुँदै काठमाडौं, पोखरा, बागलुङ र रोल्पाबाट आएका यात्रु भूमे गाउँपालिका–२ काँक्री र खाबाङमा बस्न भनिएको र रुकुम (पश्चिम) बाट आउनेलाई रुकुमकोटमै बास बस्न तथा वैकल्पिक मार्ग प्रयोग गर्न आग्रह गरिएको प्रहरी नायब उपरीक्षक डाँगीले बताए।