तिलोत्तमामा उपप्रमुखको नेतृत्वमा प्रमुख प्रशासकीय अधिकृतको कक्षमा ताला

बुटवल– रूपन्देहीको तिलोत्तमा नगरपालिकाका प्रमुख प्रशासकीय अधिकृत जीवन ज्ञवालीको कार्यकक्षमा एमालेबाट निर्वाचित जनप्रतिनिधिहरुले ताला लगाएका छन्।

नगरसभामा विवाद बढ्दै जाँदा प्रमुख प्रशासकीय अधिकृत ज्ञवालीले एकपक्षीय ढंगले काम गरेको आरोप लगाउँदै उपप्रमुख जगेश्वरी चौधरीको नेतृत्वमा ताला लगाएका हुन्।

तिलोत्तमा नगरपालिकाको १२ औं नगर सभाको तेश्रो र चौथो बैठकको उपस्थिती र गणपूरक संख्यामा ज्ञवालीको भूमिका विवादास्पद रहेको भन्दै एमाले निकट जनप्रतिनिधिहरूले कार्यकक्षमा ताला लगाएर विरोध गरेका छन्। 

उपप्रमुख चौधरीले प्रशासकीय अधिकृत ज्ञवालीले नियोजित रुपमा नगरसभाका एकै दिनका बैठकमा अलग अलग उपस्थिती गराउने गरेको आरोप लगाइन्। गणपूरक संख्या नपुगेको भन्दै आइतबार नगरप्रमुख रामकृष्ण खाणले नगरसभा स्थगित गरेका थिए। नगरसभा स्थगित लगत्तै एमालेबाट निर्वाचित जनप्रतिनिधिहरूले नाराबाजी गर्दै विरोध प्रर्दशन गरेका थिए।