लुम्बिनीको भेटी गन्न ९० जनशक्ति खपत, अपेक्षाभन्दा कम संकलन

बुटवल- महामानव गौतमबुद्धको जन्मथलो लुम्बिनी स्थित मायादेवी मन्दिरमा २२ लाख ९७ हजार रुपैयाँ भेटी संकलन भएको छ। मंगलबार सकिएको भेटी गणनामा उक्त रकम संकलन भएको लुम्बिनी विकास कोषका कोषाध्यक्ष ढुण्डिराज भट्टराई (सिद्धिचरण) ले जानकारी दिए।

कोषका कोषाध्यक्ष भट्टराईको नेतृत्वमा आइतबार दानपत्रको रकम गणना सुरु गरिएको थियो। दानपत्रको भेटी रकमको गणना गर्न चार दिनसम्म लाग्ने अनुमान गरिए पनि जनशक्ति बढाएर ३ दिनमै सकिएको हो। 

गणना कार्यका लागि सुरक्षाकर्मी र कर्मचारीसहित दैनिक ३० जनाका दरले ३ दिनमा ९० जना जनशक्ति खपत कोषले जनाएको छ। कोभिड महामारीपछि लुम्बिनीमा विदेशी पर्यटक निकै कम आएकाले लुम्बिनीमा यो पटक दानपेटिकामा भेटी कम उठेको कोषाध्यक्ष भट्टराईले बताए। 

अघिल्लो पटक गत चैत १८ गते दानपत्र खोलिएको थियो। भेटीबापत उठ्ने रकमबाट करारका कर्मचारीलाई तलब र अन्य व्यवस्थापनको काम गर्दै आएको विकास कोषले जनाएको छ।