बेपत्ता विमानमा सवार थिए एकै परिवारका ४ जना

काठमाडौं- आइतबार बिहानदेखि सम्पर्कविहीन तारा एयरको विमानमा गोरखाका एकै परिवारका चार जना सवार रहेको पाइएको छ। बिहान ९ बजेर ५५ मिनेटमा पोखराबाट जोमसोमका लागि उडेको तारा एयरको ट्विनटर विमान करिब १०:१० पछि सम्पर्कविहीन भएको विमानमा उनीहरू सवार रहेको पाइएको हो। 

जहाजमा १९ यात्रु र चालक दलका तीन सदस्यसहित २२ जना सवार रहेकोमा गोरखाको सहिद लखन गाउँपालिका वडा नम्बर ५ तीनमानेका एकै परिवारका चार जना भएको वडाध्यक्ष यमबहादुर रानामगरले जानकारी दिए। ‘विमान बेपत्ता भएको सुनिएको छ। विमानमा रहेकामध्ये ४ जना यसै गाउँपालिकाका एकै परिवारका सदस्य हुन्,' वडाध्यक्ष रानामगरले नेपाल समयसँग भने, 'हिजो मात्रै उनीहरू मुस्ताङ जाने भनेर पोखरा गएका रहेछन्। चारै जनाको मोबाइलको स्विच अफ छ।’

वडाध्यक्ष रानामगरका अनुसार बुबा गणेशनारायण श्रेष्ठ, आमा रश्मि श्रेष्ठका साथै दुई छोरी रोजिना र रविना बेपत्ता विमानमा सवार थिए। उनीहरूले पोखरा हुँदै मुस्ताङ जाने खबर आफन्तलाई जानकारी गराएका थिए। ‘५ जनाको परिवार थियो। दुई छोरीहरु रविना र रोजिना वैशाख ३० गते मात्रै अमेरिकाबाट आएका थिए,' रानामगरले भने, 'अर्का छोरा पनि अमेरिकामा नै छन्।'

भर्खरै सम्पन्न स्थानीय निर्वाचनमा आफू वडाध्यक्षमा निर्वाचित भएपछि गणेशले फोन गरेर बधाई दिएको समेत रानामगरले स्मरण गरे। 'छोरीहरुलाई घुमाउन लैजानु छ भनेर उनी हिजो मात्रै पोखरा गएका थिए,' रानामगरले भने। 

तारा एयरले विमान खोजी कार्य जारी रहेको बताएको छ। 

तर नेपाल वायुसेवा प्रदायक संघका प्रवक्ता योगराज कँडेलले भने तारा एयरको ९एन- एइटी साइनको ट्विनअटर जहाज लार्जुङ क्षेत्रमा 'लोकेट' भएको जानकारी दिएका छन्। 

'जहाज लार्जुङ क्षेत्रको डाँडाको खोँचमा 'लोकेट' भएको छ। खराब मौसमका कारण घटनास्थलमा हेलिकोप्टर पुग्न सकेको छैन,' उनले भने, 'तीनपटकसम्म प्रयास गर्दा पनि हेलिकोप्टरबाट त्यहाँ पुग्ने प्रयास सफल भएको छैन। वर्षा भइरहेको छ। त्यहाँ पुग्न निकै कठिन छ। अब पैदल जाने प्रयास भइरहेको छ।'

जहाजमा १३ नेपाली, ४ भारतीयसहित २ अन्य देशका नागरिक थिए।

यी हुन् विमानमा रहेका चालक दलका सदस्य र यात्रुहरु

चालक दल

१. क्याप्टेन प्रभाकर घिमिरे

२. उत्सव पोखरेल

३. एयर होस्टेज क्रिष्टी थापा

यात्रुहरु

१. बान्देकर वैसवी

२. ईन्द्रबहादुर गोले

३. पुरुषोत्तम गोले

४. राजनकुमार गोले

५. मेइक ग्रीटग्राफ

६. वसन्त लामा

७. गणेश नारायण श्रेष्ठ

८. रवीना श्रेष्ठ

९. रश्मी श्रेष्ठ

१०. रोजिना श्रेष्ठ

११. प्रकाश सुनुवार

१२. मकरबहादुर तामाङ

१३. राममाया तामाङ

१४. सुकुमाया तामाङ

१५. तुलसादेवी तामाङ

१६. अशोककुमार त्रिपाठी

१७. धनुश त्रिपाठी

१८. ऋतिका त्रिपाठी

१९. वी विलनर