८२९ पदका लागि मोरङमा ४ हजार ३६१ जनाको उम्मेदवारी

विराटनगर– यही वैशाख ३० गते हुने स्थानीय तह निर्वाचनका लागि मोरङबाट ४ हजारभन्दा बढीको उम्मेदवारी परेको छ। वैशाख ११ र १२ गते दुई दिन गरी १७ वटा स्थानीय तहका प्रमुख र उपप्रमुख र १५९ वडामा गरी ४ हजार ३६१ जनाको उम्मेदवारी परेको प्रदेश निर्वाचन कार्यालय विराटनगरले जनाएको छ। 

विराटनगर महानगरपालिका सहित ९ नगर प्रमुख पदका लागि ८६ र ८ वटा गाउँपालिका अध्यक्ष पदका लागि ६३ जनाको उम्मेदवारी परेको प्रदेश निर्वाचन कार्यालयका सूचना अधिकारी तीर्थ अधिकारीले बताए। उनका अनुसार उपप्रमुखमा ७७ र उपाध्यक्षमा ५२ जनाको उम्मेदवारी परेको छ। १५९ वडाध्यक्षका लागि १ हजार १, महिला वडा सदस्यमा ७५४, दलित सदस्यमा ६९६ र खुल्ला सदस्यमा १ हजार ६३२ जनाले उम्मेदवारी दर्ता गरेको सूचना अधिकारी अधिकारीले बताए। 

यसैगरी प्रदेश १ का १३७ पालिकाको प्रमुखमा ९ सय ८ जनाले उम्मेदवारी दिएका छन्। एक महानगरपालिका, २ उपमहानगरपालिका र ४६ नगरपालिकाको प्रमुख पदमा उम्मेदवारी दिनेको संख्या चार सय १९ पुगेको छ। ८८ गाउँपालिकाको अध्यक्षमा चार सय ८९ जनाले उम्मेदवारी दिएका छन्। उपमेयरमा तीन सय ११ र उपाध्यक्षमा तीन सय ९१ गरेर पालिकाको उपप्रमुखमा सात सय दुई जनाले मनोनयन दर्ता गराएका छन्।

प्रमुख र उपप्रमुखमा उम्मेदवारी दिनेको संख्या एक हजार छ सय १० पुगेको छ। वडाध्यक्षमा पाँच हजार १७, महिला सदस्यमा तीन हजार आठ सय, दलित महिला सदस्यमा तीन हजार चार सय चार र खुला सदस्यमा आठ हजार ४८ जनाले उम्मेदवारी दिएका छन्। 

प्रदेश १ भरिबाट २१ हजार आठ सय ७९ जनाको उम्मेदवारी परेको प्रदेश निर्वाचन कार्यालय विराटनगरका प्रमुख लेवन काश्यप अधिकारीले जानकारी दिए। उनका अनुसार अझै पनि प्राविधिक हिसाबका केही काम बाँकी रहेकाले उम्मेदवारी दिनेको संख्या बढ्न सक्छ।