चोरी आरोपमा पक्राउ परेका रुद्रबहादुर प्रहरी हिरासतमै घाँटी रेटिएको अवस्थामा भेटिए

बुटवल– बुटवलमा प्रहरी हिरासतमा रहेका एक पुरुष घाँटी रेटिएको अवस्थामा फेला परेका छन्। गएको शनिबार तामाको तार चोरीको आरोपमा पक्राउ परेका रुपन्देहीको बुटवल उपमहानगरपालिका–११ देवीनगरका २८ वर्षिय रुद्रबहादुर नेपाली घाँटी रेटिएको अवस्थामा सोमबार हिरासतमा भेटिएका हुन्। 

घाँटीबाट रगत आएको देखेपछि प्रहरीले सोमबार दिउँसो नै लुम्बिनी प्रादेशिक अस्पताल बुटवल लगेको प्रहरीले जनाएको छ। घाइते नेपालीको उपचार भइरहेको छ। शनिबार तामाका तारहरु कवाडी पसलमा बेच्दै गरेको अवस्थामा नेपालीलाई प्रहरीले पक्राउ गरेको थियो।

बुटवल औद्योगिक क्षेत्र र विभिन्न स्थानबाट तामाका तारहरु चोरी भएको उजुरीका आधारमा अनुसन्धानमा रहेको प्रहरीले नेपालीलाई कवाडी खानामा तामा बेच्दै गरेको अवस्थामा पक्राउ गरेको इलाका प्रहरी कार्यालय बुटवलका प्रहरी नायव उपरीक्षक ठगबहादुर केसीले बताए। एक बोरा तामाको तारसहित पक्राउ परेका नेपालीमाथि अनुसन्धान अघि बढाउन हिरासतमा राखेको अवस्थामा घाँटीमा चोट लागेको देखिएको प्रहरी नायव उपरीक्षक केसीले बताए। 

‘आफैंले धारिलो हतियारले घाँटी रेटेर आत्महत्या गर्न खोजेको जस्तो पनि देखिन्छ, यसबारे अनुसन्धान भइरहेको छ,’ डीएसपी केसीले भने। यता नेपालीका आफन्तले भने धारिलो हतियार प्रयोग गरेर घाँटी काटिएकाले घटना शकास्पद रहेको बताएका छन्। हिरासतभित्रै घाँटी रेटिनु गम्भीर भएको भन्दै छानविन गर्न नेपालीकी दिदी मनकुमारी सार्कीले माग गरिन्।

‘हिरासतमा रहेको व्यक्तिलाई चोट कसरी लाग्यो? यसैमा हामी चकित छौं। सामान केही भेटिएको छैन, पकेटमा केही पनि छैन, घाँटीमा धेरै काटिएको छ,’ मनकुमारीले भनिन्। उनले अवस्था गम्भीर रहेकाले भाइको भेन्टिलेटरमा राखेर उपचार भइरहेको बताइन्।  चोरी अभियोगमा पक्राउ परेका रुद्रबहादुर लुम्बिनी प्रादेशिक अस्पताल बुटवलमा सरसफाइमा कार्यरत कर्मचारी हुन्। 

उनकी दिदी मनकुमारी पनि त्यहिँ कार्यरत छिन्। ‘शनिबार पक्राउ परेको भाइको घाँटी काटिएको भनेर इमर्जेन्सीमा ल्याएपछि हिजो ४ बजेतिर थाहा पाएँ,’ मनकुमारीले भनिन्, ‘स्वास नली आधामात्रै काटिएकाले अहिलेसम्म जीवित छ।’ उनले चिकित्सकहरुले निको हुने आश्वासन दिएको बताइन्।