आठ महिनापछि पारित भयो कर्णालीको बजेट

काठमाडौं– कर्णाली प्रदेश सरकारले ल्याएको आर्थिक वर्ष २०७८–०७९ को बजेट आठ महिनापछि प्रदेशसभाबाट पारित भएको छ। बजेट ल्याउने प्रयोजनका लागि ल्याइएको अध्यादेश प्रतिस्थापन गरी पारित गरिएको हो।

अध्यादेशमार्फत ल्याइएको बजेट मंगलबार प्रदेशसभा सदस्यहरुको बहुमतले पारित भएको छ। विनियोजन अध्यादेश ०७८ र आर्थिक अध्यादेश ०७८ प्रतिस्थापन गर्न बनेका विनियोजन विधेयक ०७८ र आर्थिक विधेयक ०७८ प्रदेश सभाबाट बहुमतले पारित गरिएको हो।

गत असार १ मा आव ०७८–०७९ को बजेट प्रदेश सभामा पेश भएको थियो। त्यसपछि प्रमुख प्रतिपक्षी नेकपा एमालेले सदनमा अवरोध गरेपछि बजेटमाथि छलफल नै हुन पाएको थिएन। संसदबाट उक्त बजेट पारित नभएपछि तत्कालीन मुख्यमन्त्री महेन्द्रबहादुर शाही नेतृत्वको सरकारले अध्यादेशमार्फत बजेट ल्याएको थियो।

चालू आवमा कर्णाली प्रदेश सरकारको बजेट ३६ अर्ब ५४ करोड ६६ लाख ३६ हजार छ।