मोरङमा बालिकाको शव भेटिएपछि स्थानीयको प्रदर्शन, बलात्कारपछि हत्याको आशंका

काठमाडौं– दुई दिनदेखि बेपत्ता रहेकी बालिकाको शव खाल्डोमा गाडेको अवस्थामा भेटिएपछि प्रहरीले शंकास्पद दुई जनालाई पक्राउ गरेको छ। मोरङको लेटाङ नगरपालिका–८ लालहिरा सामुदायिक वनमा शव भेटिएको हो।

जिल्ला प्रहरी कार्यालय मोरङका अनुसार शुक्रबार बिहान लेटाङ–८ ज्यामिरे टोलकी १२ वर्षीया करुणा राईको शव खाल्डोमा भेटिएको हो। प्रहरीले शव उत्खनन् गरेर बाहिर निकालेको छ। तर स्थानीयले पोष्टमार्टमका लागि लैजान अवरोध गरेका छन्। स्थानीयले बलात्कारपछि हत्या भएको आशंका गर्दै दोषीलाई पक्राउ नगरेसम्म शव उठाउन नदिने भन्दै प्रदर्शन गरिरहेका छन्।

निर्वस्त्र अवस्थामा शव भेटिएका कारण बलात्कारपछि हत्या भएको हुन सक्ने प्रहरीको पनि अनुमान छ। स्थानीय जाते माध्यमिक विद्यालयमा कक्षा ६ मा अध्ययनरत बालिका बुधबार दिउँसो हराएकी थिइन्। स्कुल गएकी छोरी घर नआएपछि परिवारले प्रहरीलाई खबर गरेका थिए।

प्रहरीले खोजी गर्ने क्रममा आज शव गाडेको अवस्थामा फेला परेको हो। शव भेटिएको स्थान जाते बजारबाट करिब डेढ किलोमिटर टाढा पर्छ।