प्रदेश १ को नाम 'किरात–लिम्बुवान–मधेस–शेपालुङ' राख्न प्रस्ताव

विराटनगर– जनता समाजवादी पार्टी (जसपा) ले प्रदेश १ को नाम ‘किरात–लिम्बुवान–मधेस–शेपालुङ’ राख्नुपर्ने धारणा सार्वजनिक गरेको छ। 

पछिल्लो समय प्रदेश नामाकरणको विषयले चर्चा पाइरहेको बेला जसपाले प्रदेशको नाम मौलिक सभ्यता, ऐतिहासिक र राजनीतिक पृष्ठभूमि तथा पहिचानका आधारमा ‘किरात–लिम्बुवान–मधेस–शेपालुङ प्रदेश’ राख्नुपर्ने बताएको हो। 

जसपा प्रदेश १ का अध्यक्ष प्रवीण चाम्लिङले आज विज्ञप्ति जारी गरी प्रदेश नामकरण सम्बन्धमा २०७७ साल असोज २३–२४ गते नै निर्णय गरिएको स्मरण गराउँदै प्रदेश १ को नामाकरण पहिचानका आधारमा नै हुनुपर्दछ भन्नेमा जसपा स्पष्ट र प्रतिबद्ध रहेको उल्लेख छ। 

हाल प्रदेशको नाममकरणबारे भइरहेको बहस र छलफलले राजनीतिक सरगर्मी ल्याएको भन्दै जसपाले पछिल्लो राजनीतिक घटनाक्रमहरुलाई स्वागतयोग्य भन्दै गम्भीरताका साथ लिएको उल्लेख छ। 

आज नै प्रदेश १ सरकारले प्रदेशको नामाकरणबारे छलफल गर्न सर्वदलीय बैठक आह्वान गरेको छ। बैठकमा प्रदेशसभामा प्रतिनिधित्व गर्ने दलका प्रमुखहरु, संसदीय दलका नेताहरु सहभागी हुनेछन्।