हिउँ खेल्न गएका दुई किशोर गोरखामा मृत फेला परे

काठमाडौं– गोरखामा हिउँ खेल्न गएका दुई किशोर १० दिनपछि मृत फेला परेका छन्। स्थानीयबासी र प्रहरीको संयुक्त खोजी टोलीले आइतबार उनीहरुको शव फेला पारेको हो।

जिल्ला प्रहरी कार्यालय गोरखाका डीएसपी प्रकाश दाहालका अनुसार उनीहरूको शव धार्चे गाउँपालिका–१ कुन्द्रामा खोंचमा भेटिएको हो। बारपाक सुलिकोट गाउँपालिका १ का १६ वर्षीय करण घले र वडा नम्बर २ का सञ्जय घलेको शव फेला परेको हो। दुवै साथी हुन्। 

हिउँले पुरिएर हराइरहेको र अहिले हिउँ पग्लिँदै गएर मृतकको शव देखा परेको दाहालले बताए। उनीहरु माघ २० गते हिउँ खेल्न भन्दै धार्चे गाउँपालिकास्थित लाप्राक हिँडेका थिए। फर्केर नआएपछि स्थानीय र आफन्त सोही दिन खोज्न हिँडेका रहेछन्। आफन्तले प्रहरीलाई भने तीन दिनपछि मात्रै खबर गरेका थिए। आफन्तले उजुरी दिनासाथ प्रहरीले उनीहरूको खोजी थालेको थियो।

घरमा र बाटोमा साथीहरूलाई भेट्दा पनि उनीहरूले आफूहरु लाप्राक हिउँ खेल्न जाने भनेको र फोनको लोकेसन पनि सोही स्थानमा देखाएको आधारमा प्रहरीले उनीहरूको खोजी गरेको थियो।