उखुबारी घटना : थप एक आरोपित पक्राउ

विराटनगर– मोरङको धनपालथान–७ को उखुबारी हत्या घटनामा संलग्न थप एक आरोपित शुक्रबार साँझ पक्राउ परेका छन्।

पक्राउ परेका व्यक्ति सुनसरीका भएको खुलेको छ। प्रहरीले उनको नाम गोप्य राखेको छ। अनुसन्धानको लागि थप एक जना पक्राउ परेको मोरङ प्रहरी प्रमुख एसपी जनार्दन जिसीले पुष्टि गरेका छन्। पक्राउ परेका व्यक्ति हत्या गरेपछि उखुबारीमा खाडल खन्ने व्यक्ति रहेको घटनाको अनुसन्धान गर्दै आएका एक प्रहरी अधिकृतले जानकारी दिए। हत्या घटनामा अझै दुई जना पक्राउ गर्न बाँकी रहेको प्रहरीले बताएको छ।

मोरङ प्रहरीले हत्या घटनामा संलग्न तीन जनालाई शुक्रबार पत्रकार सम्मेलन गरि सार्वजनिक गरेको छ। तेर्हथुम संक्रान्ति २ घर भइ काठमाण्डौ बस्दै आएका ६३ वर्षिय मोहन लिम्बु, सुनसरीको धरान घर भइ भक्तपर बस्दै आएका ४८ वर्षिय राजेन्द्र श्रेष्ठ र सप्तरीको शम्भुनाथ नगरपालिका ४ घर भइ काठमाण्डौं बस्दै आएका ३२ वर्षिय शम्भु कुमार चौधरीको हत्या आरोपमा सिरहा घर भई काठमाण्डौं बस्दै आएका ३१ बर्षीय अनिलकुमार मण्डल, मोरङको जहदा गाउँपालिका ४ सिशवनीका २९ वर्षिय अमित साह भनिने दिनानाथ सोनार र धनपालथान गाउँपालिका ७ कमलपुरका ६२ वर्षिय नासिर आलमलाई पक्राउ गरि सार्वजनि गरेको छ। पक्राउ परेका मध्ये मण्डल मुख्य योजनकार भएको प्रहरीले बताएको छ ।

ललितपुरको क्यान्सर अस्पताल नजिक रहेको २५ रोपनी ७ आना जग्गा बैंक ग्यारेन्टी मिलाएवापत आउने १ करोड ५० लाख रुपैयाँ ‘कमिशन’ एक्लै हत्याउन मुख्य योजनाकार मण्डलले फरक फरक मितिमा तीन जना साझेदार साथीको हत्या गरेको देखिएको प्रहरीको भनाई छ ।