मधेश प्रदेशका मुख्मन्त्री राउतको घरमा ढुंगा प्रहार

पर्सा- ‘मधेश प्रदेश’का मुख्यमन्त्री लालबाबु राउत गद्दीको घरमा ढुंगा प्रहार गरिएको छ। मधेश प्रदेशको राजधानी जनकपुरधाम राखिएको भन्दै नेपाली कांग्रेसका नेता भोला कलवारको नेतृत्वमा निकालिएको विरोध र्‍यालीमा सहभागी एक युवकले ढुंगा प्रहार गरेका हुन्। 

प्रदेशको राजधानी वीरगंज नभएको आक्रोशमा वीरगंज महानगरपालिका वडा नं. १ का छपकैयाका २७ वर्षीय सुमन पटेलले करिब ३ बजे मुख्मन्त्री राउतको घरमा ढुंगा प्रहार गरेका हुन्। ढुंगा प्रहारले मुख्यमन्त्री राउतको घरको पश्चिमतर्फको सिसा फुटेको छ। 

ढुंगा प्रहार गर्ने युवकलाई नियन्त्रणमा लिइएको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक ओमप्रकाश खनालले जानकारी दिए। 

वीरगंजबासी भएर पनि मुख्यमन्त्री राउतले प्रदेशको राजधानी वीरगंज नबनाइ जनकपुरधाम बनाएको भन्दै विरोध प्रदर्शन भइरहेको छ। 

प्रदेशसभाको सोमबारको बैठकबाट नाम मधेश प्रदेश र राजधानी जनकपुरधाम बनाउने प्रस्ताव पारित गरिएको थियो। जसमा दुई तिहाइ बहुमत सांसदले राजधानी जनकपुरधाम राख्‍ने प्रस्तावको पक्षमा मतदान गरेका थिए।