मुगुका आगलागी पीडितलाई कर्णाली सरकारको ६२ लाख राहत

सुर्खेत- कर्णाली प्रदेश सरकारले मुगुका आगलागी पीडितलाई झण्डै ६२ लाख राहत उपलब्ध गराउने निर्णय गरेको छ। बुधबार बसेको मन्त्रिपरिषद्को बैठकले पीडितलाई क्षतिको आधारमा २० हजारदेखि चार लाखसम्म राहत उपलब्ध गराउने निर्णय गरेको सरकारका प्रवत्ता एवं आर्थिक मामिला तथा योजना मन्त्री विन्दमान विष्टले जानकारी दिए।

जसअनुसार पूर्ण रूपमा घर क्षति भएकामध्ये दश लाखसम्म क्षति भएका पीडिलाई दुई लाख, ११ लाखदेखि ५० लाखसम्म क्षति भएकालाई एक लाख ५० हजार, ५१ लाखदेखि एक करोडसम्म क्षति भएकालाई दुई लाख, एक करोडदेखि एक करोड ५० लाखसम्म क्षति भएकालाई दुई लाख, १ करोड ५१ लाखदेखि तीन करोडसम्म क्षति भएकालाई दुई लाख ५० हजार र तीन करोडभन्दा माथि क्षति भएकालाई चार लाख रकम उपलब्ध गराउने निर्णय गरेको सरकारका प्रवत्ता विष्टले बताए। पूर्ण रूपमा घर क्षति भएकालाई दुई किस्ता गरेर रकम उपलब्ध गराइने छ।

त्यस्तै आंशिक रूपमा घर क्षति भएकामध्ये एक लाखसम्म क्षति भएकालाई २५ हजार, २७ लाखदेखि ५० लाखसम्म क्षति भएकालाई ५० हजार, ५० लाखभन्दा बढी क्षति भएकालाई ७५ हजार दिने निर्णय गरेको हो।

त्यस्तै पीडित व्यवसायीमध्ये २० लाखसम्म क्षति भएकालाई ३० हजार, २१ लाखदेखि ४५ लाखसम्म क्षति भएकालाई ५० हजार, ४६ लाखदेखि ७० लाखसम्म क्षति भएकालाई ७५ हजार र एक करोडभन्दा माथि क्षति भएकालाई एक लाख रकम उपलब्ध गराउने निर्णय गरेको छ।

घर बहालमा बस्नेहरूमध्ये दश लाखसम्म क्षति भएकालाई २० हजार, २० लाखदेखि ५० लाखसम्म क्षति भएकालाई ४० हजार र ५० लाखभन्दा माथि क्षति भएकालाई ६० हजार रकम दिने निर्णय गरेको छ।

मन्त्रिपरिषद् बैठकले पीडितलाई रकम उपलब्ध गराउन जिल्ला प्रशासन कार्यालय मुगुलाई स्वीकृत दिएको छ। आगलागीबाट पूर्ण रूपमा घर क्षति भएका २० जना, आंशिक रूपमा घर क्षति पुगेका ५ जना, व्यवसायीहरू २६ जना र घरबहालमा बस्ने ३५ जना पीडित छन्।

गएको कार्तिक २९ गते छायानाथ रारा नगरपालिका – १ को गमगढी बजारमा आगलागी हुँदा २१ घरमा क्षति पुगेको थियो। आगलागीबाट ८५ घरपरिवार पीडित भएका थिए। उनीहरूलाई क्षतिका आधारमा कुल ६१ लाख ८५ हजार राहत उपलब्ध गराउने निर्णय गरेको हो।