जाजरकोट कांग्रेसको पूरै कार्यसमिति सर्वसम्मत, सभापतिमा वेदराज सिंह

सुर्खेत- नेपाली कांग्रेसले जाजरकोटमा सर्वसम्मत नेतृत्व निर्वाचित गरेको छ। आइतबार स्थानीय कार्यदलले सभापतिसहित सम्पूर्ण जिल्ला कार्यसमिति सर्वसम्मत निर्वाचित गरेको हो । 

जिल्ला सभापतिमा वेदराज सिंह, उपसभापति खड्क बीसी र रत्न खड्का, सचिवमा हरिशचन्द्र बस्नेत र तेजविक्रम शाह निर्वाचित भएका छन्।

त्यस्तै सह–सचिवमा खडक विसी (पजारु) र छवि पन्त सर्वसम्मत भए। कोषाध्यक्षपछि मनोनित गरिनेछ। नगरपालिकाबाट तीन जना र गाँउपालिकाबाट दुई जना सदस्यसमेत सर्वसम्मत निर्वाचित भएको नवनिर्वाचित सभापति सिंहले जानकारी दिए। निर्वाचन समितिले निर्वाचित कार्यसमितिको औपचारिक घोषणा सोमबार मात्रै गर्नेछ।

‘पार्टीलाई बलियो बनाउन सर्वसम्मत नेतृत्व छनौँँ,’ नेपाल समयसँग सिंहले भने, ‘सोमबार मात्रै पदाधिकारीको औपचारिक घोषणा हुन्छ।’ पार्टीलाई बलियो बनाउन र गुटगत राजनीतिको अन्त्य गर्ने उद्देश्यले सर्वसम्मत नेतृत्व चयन गरिएको उनको भनाइ छ।

यसअघि संस्थापन समूहमा रहेका सिंह पछिल्लो समय मध्यमार्गी नेताका रुपमा चिनिन्छन्। मध्यमार्गी नेता भएकै कारण उनलाई दुवै पक्षले सभापति मान्न तयार भएको हुन्। सभापति बाहेकका अन्य पदाधिकारी भने संस्थापन र संस्थापनइतर समूहले बराबरी लिएका छन्।

यस्तै प्रदेश (क) को क्षेत्रीय सभापतिमा लिलाबहादुर शाह र (ख) मा जनक शर्मा (न्यौपाने) निर्विरोध निर्वाचित भएका छन्। कांग्रेसले जाजरकोटमा वडादेखि जिल्लासम्मका पदाधिकारी सर्वसम्मत चयन गरेको हो।