तीन दिनपछि खुल्यो विराटनगर विमानस्थल, रात्रिकालीन उडान तत्काल नहुने

विराटनगर- सोमबार र मंगलवारको अविरल बर्षाका कारण विराटनगर विमानस्थल डुवानमा परेपछि अवरुद्ध भएको हवाई सेवा शनिबार विहान देखि सञ्चालन हुँदैछ ।

नागरिक उड्ययन कार्यालय विराटनगरका प्रमुख उत्सव खरेलले शनिबार विहान देखि हवाई सेवा सञ्चालन हुने बताए । उनले भने,‘ तत्कालका लागि विहान ७ देखि साँझ ५ वजे सम्म मात्र उडान हुनेछ ।’

विमानस्थलका उपकरणहरु पानीमा डुवेकाले रात्रीकालिन उडान हुन केही दिन लाग्ने उनले बताए । शनिबारको पहिलो उडान साढे ८ वजे यति एयरको हुने खरेलले बताए ।
विराटनगर विमानस्थलबाट दैनिक बुद्ध एयरले ९, यति एयरले ५, सौर्य एयर र श्री एयरलाइन्सले ४–४ र गुण एयरले एक उडान गर्दै आएका छन् ।

विमानस्थलको धावनमार्ग, पार्किङ एरिया जलमग्न भएपछि मंगलबारदेखि विराटनगरबाट हुने सबै उडान तथा अवतरण रोकिएका थिए ।