अत्यधिक मदिरा सेवन गरेर श्रीमतीको हत्या

सुर्खेत- सल्यानमा एकजनाले बसुलो (हलो, जुवा बनाउन प्रयोग गरिने घरेलु हतियार) प्रहार गरेर श्रीमतीको हत्या गरेका छन्।

कुमाख गाउँपालिका ५ तिमिलेका ४७ वर्षीय कविराज खड्काले ४२ वर्षीया श्रीमती कली खड्काको हत्या गरेका हुन्। ‘पहिलेदेखि नै श्रीमान् श्रीमतीबीच घरायसी विवाद रहेछ,’ सल्यानका डीएसपी गोविन्द थापाले भने, ‘मंगलबार राति छोराछोरीसँगै सुतिरहेकी श्रीमतीलाई कविराजले बसुलोले प्रहार गरेर हत्या गरेका रहेछन्।’ कली १४ वर्षिय छोरा र ६ वर्षिया छोरीसँगै सुतेकी थिइन्।

उनी निदाएको मौका छोपेर कविराजले टाउको र घाँटीमा बसुलो प्रहार गरेर हत्या गरेको थापाले जनाए। उनलाई राति नै प्रहरीले नियन्त्रणमा लिइसकेको छ। श्रीमतीको हत्या गर्नुअघि कविराजले अत्यधिक मदिरा सेवन गरेको प्रहरीले जनाएको छ।