खड्‌कुँलोमा यात्रा गर्ने आकाश र ऐश्वर्याको जोडी

काठमाडौं– आकाश र ऐश्वर्या तोकिएकै मिति सोमबार विवाह गर्न तयार थिए। तर भारतको केरला राज्यको थालावाद्यको यो जोडीको विवाहलाई वर्षाले अवरोध गरिदियो। त्यसपछि खड्‌कुँलोलाई डुंगा बनाएर उनीहरू विवाह गर्न मन्दिरसम्म पुगेका थिए।

वरवधू खड्‌कुँलोमा बसेर जलमग्न सडकबाट विवाह गर्न गएको तस्बिर भारतीय सामाजिक सञ्जालमा भाइरल भएको छ। उनीहरू दुवै जना स्वास्थ्यकर्मी हुन्। आकाश र ऐश्वर्याको विवाह हुने मन्दिर पनि केही डुबेको थियो। उनीहरूलाई नातेदारले नजिकैको अर्को मन्दिरबाट सापट लिएको खड्‌कुँलोमा राखेर विवाहस्थलसम्म तानेर पुर्‍याएका थिए।

केरला राज्य अहिले बाढी र पहिरोले आक्रान्त बनेको छ। त्यहाँ धनजनको ठूलो क्षति पुगेको छ। वर्षाका कारण नदीमा पानीको तह बढेको छ। पानीले पुल र सडक बगाएको छ भने कतिपय गाउँ यातायात सञ्जालबाट विच्छेद भएका छन्।

आकाशले आफ्नो विवाहको मिति अलि पहिले निश्चित गरिएको र थप बिदा लिन असहज हुने भएकोले सार्न नचाहेको समाचारसंस्था पीटीआईलाई बताएका छन्।