'बैंकले धितो सुन नलिएपछि दशाजस्तै बन्‍यो दसैं'

हुम्ला- हुम्लाका दलित समुदायलाई  आर्थिक अभावका कारण दसैँ मनाउन असहज भएको छ। कोरोना महामारीका उनीहरु  बेरोजगारीमा बस्‍न बाध्य छन्। दसैंका आर्थिक स्रोत जुटाउन उनीहरुले आफ्नो घरमा राखेको सुनसमेत कर्जामा राखेका जनाइएको छ। 

ताँजाकोट वडा २ का सिमान विश्कर्माले दसैँ मनाउँनका लागि चरम आर्थिक अभाव भएको गुनासो गरे। उनले भने, 'म सधै कमाई गर्न भारत जान्थे।  गत वर्ष र यस वर्ष कोरोना महामारीको डर लागेर जान पाइएन।  श्रीमतीको कानमा लगाउने आधा तोलाको सुनको गहना विक्री गरेर दसैँ मनाउने जोहो छु।'

वर्षको एक पटक आउने चाड भएका कारण सबैको घरमा मीठो मसिनो खाएर रमाउने देखेर आफूले पनि घरमा जे-जति भएको त्यहि सुनको गहाना बिक्री गरेर दसैं मनाउन लागेको उनको भनाइ थियो। उनले भने, 'रोजगारीका लागि भारत, चीन लगायतका  देशमा गएर काम गरेर दसैं मनाउन पैसा कमाइन्थ्यो। यस वर्ष त्यसो हुन सकेन्।'

यस्तो पीडा उनको मात्र नभइ जिल्लाका अन्यको पनि उस्तै छ। सिमकोट गाउँपालिका वडा ६ का रामबहादुर सुनारले यस वर्षको दसैं आर्थिक अभावका कारण मनाउन नसकिएको बताए। 

दसैंमा निको नौलो, मिठो मसिनो खाने रहरमा राष्ट्रिय बाणिज्य बैंकमा सुन राख्न जाँदा बैँकले सुन नराखेपछि यस वर्षको दसैं दसा जस्तै भएको उनको गुनासो छ।  कोरोना कहरका कारण यहाँको हिल्सा नाका नखुलेपछि यस वर्ष खसिको मूल्य  पनि यहाँ आकासिएको छ। -रासस