वीरगञ्जमा भित्र्याइयो फूलपाती

वीरगञ्ज- दशैंको आज सातौं दिन देशभर विभिन्न शक्तिपीठहरुमा भक्तजनहरुको घुइँचो लागेको छ। फूलपातीको अवसरमा तराईका बारा, पर्सा, रौतहट लगायतका जिल्लामा पनि आज बिहानदेखि विभिन्न शक्तिपीठहरुमा भक्तजनको घुइँचो छ।

मनोकांक्षा पुरा हुने जनआस्था राखी पर्सा जिल्लाको शक्तिपीठहरु गहवामाई मन्दिर, विर्तामाई मन्दिर, विन्दवासिनी माई र मनसा माई मन्दिरमा बिहानैदेखि देवी माताको दर्शनका लागी दर्शनार्थीहरुको घुइँचो लागेको छ।

गत वर्ष निषेधाज्ञा जारी भएका कारण भक्तजनहरुलाई मन्दिर प्रवेशमा रोक लगाइए पनि यस वर्ष भने पीठहरुमा भक्तजनहरुको उल्लेख्य उपस्थिति रहेको छ।

यहाँको नवदूर्गा पूजास्थलमा केरा, दारिम, धान, हलेदो, माने, कर्चुर, बेल, अशोकका फूलपाती लिएर सेना, सशस्त्र प्रहरी, नेपाल प्रहरीको टेकेडीले मालपोत चोकबाट गहवामाई मन्दिरमा फूलपाती भित्र्याएको थियो।

पर्साका प्रमुख जिल्ला अधिकारी र वीरगञ्ज महानगरका मेयरले फूलपातीको अवसरमा विशेष पूजाआजा गरेका छन्। गहवामाई मन्दिर परिशर अगाडि रहेको पार्कमा विशेष पूजा गरी फुलपाती भित्रयाइएको हो।

देवी कालरात्रिले चण्ड, मुण्ड र रक्तबिज राक्षसहरुको वध गरेको दिनको सम्झनामा महासप्तमी मनाउने चलन रहेको हो। आजको दिन कालरात्री देवीको पूजा आराधना गर्नाले मनोकांक्षा पुरा हुने देवी देवताको वास हुने आस्था पनि रहेको छ।

वीरगञ्जमा विजयादशमीको दशैं दिनसम्मलाई भक्तजनहरुले विशेष रुपमा गहवामाई मन्दिरमा पुजा पाठ गर्दै दशैं मनाउने गर्दछ।